شاہ محمود قریشی نے مغرب کو افغانستان کوتنہا چھوڑنے پر سنگین نتائج سے خبردار کردیا

غیر ملکی میڈیا کو  انٹرویو دیتے ہوئے وزیر خارجہ نے مغرب پر زور دیا کہ وہ طالبان کے ساتھ بات چیت کرے کیونکہ بصورت دیگر افغانستان ایک اور انتشار کا شکار ہو سکتا ہے۔انہوں نے کہا کہ یہ ان تنظیموں کو جگہ دے گا جن سے ہم سب خوفزدہ ہیں، بین الاقوامی دہشت گرد تنظیمیں جو ہم نہیں چاہتے کہ ان کے قدم افغانستان میں  جمیں ۔

شاہ محمو د قریشی نے کہا کہ  پاکستان مسلسل کہہ رہا تھا کہ امن عمل، مذاکرات اور غیر ملکی افواج کے انخلاء کا عمل ساتھ ساتھ چلنا چاہیے،  ہم ذمہ دارانہ انخلاء کا مطالبہ کر رہے تھے تاکہ عدم تحفظ کا احساس پیدا نہ ہو،ہماری خواہش تھی کہ انخلاء کے ساتھ ساتھ افغان عوام کے ساتھ انگیجمنٹ جاری رکھی جائے ،عجلت میں انخلاء،افغان عوام کو تنہا چھوڑنے کے مترادف ہے، یہی وہ غلطی تھی جو نوے کی دہائی میں کی گئی ،ضرورت اس بات کی ہے کہ عالمی برادری اس غلطی کو نہ دہرائے اور افغانوں کو تنہا نہ چھوڑے۔

وزیر خارجہ  نے امید ظاہر کی کہ طالبان ذمہ داری سے کام لیں گے۔ "انہیں اپنی غلطیوں سے سبق سیکھنا چاہیے تھا ،" اور مجھے لگتا ہے کہ وہ جو رویہ اور اپروچ لے رہے ہیں وہ ایک مختلف انداز کی عکاسی کرتا ہے۔

وزیر خارجہ نے مزید کہا کہ اگر وہ سمجھدار ہیں تو انہیں میری رائے میں بین الاقوامی رائے اور بین الاقوامی اصولوں کا احترام کرنا چاہیے۔

ایک سوال کے جواب میں وزیر خارجہ نے کہا کہ پاکستان کے خلاف طالبان کے حوالے سے ہمیشہ بے بنیاد الزامات لگائے جاتے رہے ہیں۔

انہوں نے مزید کہا کہ طالبان افغانستان میں موجود تھے ، وہ دوحہ مذاکرات کی قیادت کر رہے تھے اور ان کے قبضے سے قبل افغانستان کے چالیس سے پینتالیس فیصد حصے پر کنٹرول تھا۔ پاکستان گزشتہ چار دہائیوں سے اپنی سرزمین پر لاکھوں افغان مہاجرین کی میزبانی کر رہا ہے۔