آرمی چیف کی ٹوکیو اولمپکس میں حصہ لینے والے کھلاڑیوں کیساتھ ملاقات

پاک فوج کے شعبہ تعلقات عامہ (آئی ایس پی آر ) کے مطابق  آرمی چیف جنرل قمر جاوید باجوہ نے ٹوکیو اولمپکس میں حصہ لینے والے کھلاڑیوں کیساتھ ملاقات کی ہے۔ آرمی چیف نے کھلاڑیوں کی کارکردگی اورجذبے کی تعریف کی،  اولمپیئنز نے حوصلہ افزائی پر آرمی چیف کا شکریہ ادا کیا ہے۔

ٹوکیو اولمپکس میں دس رکنی پاکستانی دستے نے مناسب سہولیات نہ ہونے کے باوجود بہترین پرفارمنس دی۔آرمی چیف جنرل قمر جاوید باجوہ نے میگا ایونٹ میں حصہ لینے والے کھلاڑیوں سے ملاقات کی،ویٹ لفٹر طلحہ طالب، ارشد ندیم، خلیل اختر اور گلفام جوزف اس موقع پر موجود تھے۔

آرمی چیف نے بنیادی سہولیات نہ ہونے  کے باوجود ایتھلیٹس کی فائٹنگ پرفارمنس کو سراہا،ان کا کہنا تھا پاکستانی کھلاڑیوں کی کارکاردگی سے نوجوانوں کو حوصلہ ملا ہے۔آرمی چیف جنرل قمر جاوید باوجوہ نے کہا کہ پاک فوج ہمیشہ کھیلوں کی سپورٹ کرتی آئی ہے،عالمی سطح پر ملک کی نمائندگی کھلاڑیوں کیلئے اعزاز اورقوم کیلئے فخر ہے۔

آرمی چیف نے ایتھلیٹس کو پاک فوج کی جانب سے مکمل تعاون کی یقین دہانے بھی کروائی،ایتھلیٹس نے حوصلہ افزائی پر آرمی چیف کا شکریہ ادا کیا ہے۔