وزیراعظم کا سید علی گیلانی کے انتقال پر ایک روزہ قومی سوگ کا اعلان

تفصیلات کے مطابق وزیراعظم پاکستان عمران خان نے  سینئر حریت رہنما سید علی گیلانی کو زبردست الفاظ میں خراجِ تحسین پیش کیا۔ سماجی رابطے کی ویب سائٹ ٹوئٹر پر پیغام میں وزیراعظم عمران خان نے کہاکہ مجاہدِ کشمیر سید علی گیلانی کی رحلت کی اطلاع پا کر بے حد رنجیدہ ہوں کہ عمر بھر اپنے لوگوں اور ان کے حقِ خودارادیت کیلئے ہمیشہ  جدوجہد میں مصروف  رہے۔ وہ قابض بھارتی ریاست کے ہاتھوں اسیری و اذیت کا نشانہ تو بنے مگر پوری طرح ثابت قدم رہے۔

ان کا کہنا تھا کہ ہم پاکستان میں ان کی جرات مندانہ جدوجہد کو سلام پیش کرتے ہیں اور ان کے الفاظ کو اپنے دل و دماغ میں تازہ کئے ہوئے ہیں کہ "ہم پاکستانی ہیں اور پاکستان ہمارا ہے"۔  

وزیراعظم  پاکستان نے سید علی گیلانی کے انتقال پر قومی پرچم سرنگوں رکھنے اور ایک روزہ سوگ کا بھی اعلان کیا۔

پاکستان میں ہم ان کی باہمت و بے باک جدوجہد کو سلام پیش کرتے اور انکے الفاظ کو اپنے دل و دماغ میں تازہ کئے ہوئے ہیں کہ: ”ہم پاکستانی ہیں اور پاکستان ہمارا ہے“۔ پاکستان کا قومی پرچم سرنگوں رہے گا اور ہم سرکاری طور پر ان کی وفات کا سوگ منائیں گے۔

— Imran Khan (@ImranKhanPTI) September 1, 2021

خیال رہے کہ سید علی گیلانی طویل علالت کے بعد سرینگر میں 91 برس کی عمر میں  انتقال کرگئے۔ کشمیر میڈیا سروس کی رپورٹ کے مطابق بزرگ حریت رہنما سید علی گیلانی طویل عرصے سے بیمار تھے، مقبوضہ کشمیر انتظامیہ نے سید علی گیلانی کو کئی برس سے گھر پر نظر بند کر رکھا تھا۔

کشمیر میڈیا سروس کے مطابق سید علی گیلانی 29 ستمبر 1929 کو پیدا ہوئے تھے۔مقبوضہ کشمیر کی جدوجہد آزادی میں سید علی گیلانی کا اہم کردار رہا، وہ آل پارٹیز حریت کانفرنس کے سربراہ بھی رہے۔سید علی گیلانی جماعت اسلامی جموں کشمیر کے رکن بھی رہے، بعد میں سید علی گیلانی نے تحریک حریت کے نام سے اپنی جماعت بنائی۔

سیدعلی گیلانی کے انتقال پر آزادکشمیر حکومت  نے بھی  ایک روز چھٹی اور 3روزہ سوگ کا اعلان کیا، آزاد کشمیر کے تمام ضلعی ہیڈکوارٹرز میں آج غائبانہ نماز جنازہ بھی ادا کی جائے گی۔