پاکستان نیوکلیئر سکیورٹی کی بہتری  کیلئے  اپنا کردار ادا کرتا رہے گا، نیشنل کمانڈ اتھارٹی

جی این این کے مطابق  وزیراعظم عمران خان کی زیر صدارت  نیشنل کمانڈ اتھارٹی کا اجلاس ہوا،  اجلاس میں  وفاقی وزرا، چیئرمین جوائنٹ چیفس  آف اسٹاف کمیٹی  اور سروسز چیفس  نے  شرکت کی، ڈی جی آئی ایس آئی لیفٹیننٹ جنرل فیض حمید بھی اجلاس میں شریک ہوئے ۔

این سی اے نے پاکستان کے اسٹریٹجک اثاثوں کی جامع سیکورٹی کو یقینی بنانے کے لیے کمانڈ اینڈ کنٹرول سسٹم کے ساتھ ساتھ حفاظتی اقدامات پر مکمل اعتماد کا اظہار کیا ہے۔ این سی اے کو خطے کی صورتحال بارے تفصیلی بریفنگ دی گئی۔

اعلامیے میں کہا گیا ہے کہ  پاکستان ذمہ دار ایٹمی ریاست کے طور پر جوہری سلامتی اور عدم پھیلاؤ کے اقدامات کو بہتر بنانے کی عالمی کوششوں میں معنی خیز کردار ادا کرتا رہے گا ، پاکستان ہتھیاروں کی دوڑ میں داخل ہوئے بغیر خطے میں اسٹریٹجک استحکام کو یقینی بنانے کے لیے تمام اقدامات کرے گا۔این سی اے نے مقاصدکےحصول میں کوشش کرنےوالےسائنسدانوں وانجینئرزکی تعریف کی اور  تربیت کےاعلیٰ معیار، اسٹریٹجک فورسزکی آپریشنل تیاریوں کوبھی سراہاگیا۔

اعلامیے میں کہا گیا ہے کہ  پاکستان نیوکلیئر سکیورٹی کی بہتری  کیلئے  اپنا کردار ادا کرتا رہے گا،  پاکستان ایک ذمہ دار جوہری ملک ہے، پاکستان جوہری عدم پھیلاؤکی عالمی کوششوں میں بھی کردار ادا کرتا رہے گا۔پاکستان   ذمہ دار ایٹمی ملک کی حیثیت سے عالمی سطح پر جوہری سلامتی یقینی بنانے میں کردار ادا کرتا رہے گا۔