مستحکم اور پرامن افغانستان ہی عالمی برداری کا بہتر شراکت دار بن سکتا ہے: وزیرخارجہ

تفصیلات کے مطابق افغانستان کی صورتحال پر ’ورچوئل علاقائی کانفرنس‘ سے خطاب میں وزیر خارجہ شاہ محمود قریشی کا کہنا تھا کہ کابل ایئر پورٹ کو فعال بنانا ضروری ہے تاکہ ہمارے سرحدی کراسنگ پوائنٹس پر دباو کم ہو۔

ان کا کہنا تھا کہ امریکہ کی جانب سے افغانستان کے 10ارب ڈالر منجمند کرنے سے  معاشی بحران جنم لے سکتا ہے، افغان عوام کے مسائل کے حل کیلئے عالمی برادری  کی جانب سے پائیدار امداد ضروری ہے۔

انہوں نے کہا ہے کہ پاکستان نے ہزاروں غیر ملکیوں اور افغان شہریوں کے محفوظ انخلا میں بھرپور معاونت کی،پاکستان پہلے ہی رجسٹرڈ اور غیر رجسٹرڈ 40لاکھ افغان مہاجرین کی میزبانی کررہا ہے۔

ان کا مزید کہنا تھا کہ افغانستان کی سابق حکومت کے خاتمے کے بعد مہاجرین کا بڑا بحران سامنے نہیں آیا،قریبی ہمسائے کی حیثیت سے پاکستان افغانستان سے علیحدگی اختیار نہیں کرسکتا۔