نواز شریف اس سال واپس آرہےہیں، جاوید لطیف کا دعویٰ

لاہور میں نیب دفتر کے باہر میڈیا سے گفتگو کرتے ہوئے میاں جاوید لطیف نے کہا کہ نواز شریف قوم کی قیادت کرنے خود آ رہے ہیں۔ نواز شریف کو سیٹ سے اتارنے والے خود پچھتا تو نہیں رہے لیکن پریشان ضرور ہیں۔ 

جاوید لطیف نے کہا کہ جنہوں نے نواز شریف کو نااہل کیا، جنہوں نے انکی حکومت کو ختم کیا اور تین سال میں پاکستان جس بھنور میں پھسن چکا ہے اس میں سے نکالنے کے لیے نواز شریف کو منتیں کرکے لائیں گے۔ 

لیگی رہنما نے کہا کہ تاثر دیا جا رہا کہ پیپلز پارٹی کو لایا جا رہا ہے اگر بلاول بھٹو جمہوری طریقے سے آئیں تو ن لیگ کو کوئی اعتراض نہیں ہے۔ 

انہوں نے کہا کہ میرا خاندان 1950 سے کاروبار کر رہا ہے۔ ہمارے میاں گارمنٹس اور میاں ڈپیارٹمنٹ اسٹور بھی تھے جبکہ میاں فلور مل میرے ضلع کونسل ممبر منتخب ہونے سے پہلے کی ہے۔

جاوید لطیف کا کہنا تھا کہ میں نے اپنے اختیارات کا بطور ممبر غلط استعمال نہیں کیا لیکن ذہنی طور پر بھی تیار ہوں اور اسی پر نتائج بھگتوں گا۔ انہوں نے کہا کہ نیب کو مجھ سے محبت اسوقت جاگتی ہے جب اسمبلی میں بولتا ہوں، نیب کے جواب دینے کے لیے ذہنی طور پر تیار ہوں۔

میاں جاوید لطیف نے نیب تحقیقات پر ردعمل دیتے ہوئے کہا کہ سنہ 2000 میں اسطرح کے کیس بنائے گئے تھے لیکن ایک دھیلے کی کرپشن ثابت نہیں ہوئی۔

اس سے قبل آمدن سے زائد اثاثہ کیس میں میاں جاوید لطیف نیب لاہور میں پیش ہوئے اور اپنا بیان ریکارڈ کروایا۔ نیب ٹیم نے جاوید لطیف سے تقریباً دو گھنٹہ تک تحقیقات کرتے ہوئے ذرائع آمدن سے متعلق تفصیلات طلب کیں۔

واضح رہے کہ جاوید لطیف پر 50کڑور سے زائد غیر قانونی اثاثے بنانے کا الزام ہے۔ نیب کی تین رکنی جوائنٹ انویسٹی گیشن ٹیم نے لیگی ایم این اے سے پوچھ گچھ کی۔