ٹی ٹوئنٹی ورلڈ کپ : قومی فاسٹ باؤلر حسن علی نے بھارت کو ہرانے پر نظریں جما لیں 

آن لائن پریس کانفرنس میں ان کا کہنا تھا کہ پاک بھارت میچ کا ہمیشہ پریشر ہوتا ہے لیکن ہر حال میں جیتنے کی کوشش کریں گے۔  ورلڈ کپ سے پہلے مصباح الحق اور وقار یونس کے جانے پر افسوس ہوا ،لیکن وہ غیر ملکی کوچ کیساتھ کام کرنے کیلئے تیار ہیں۔انہوں نے دورہ نیوزی لینڈ کیلئے عبد الرزاق کو باؤلنگ کوچ بنانے کے فیصلے کو خوش آئند قرار دیا ہے۔

دوسری جانب  قومی ٹیم منیجمنٹ نے نیوزی لینڈ کے خلاف پہلے ون ڈے کیلئے 12 رکنی سکواڈ کا اعلان بھی کر دیا ہے،ٹیم میں کپتان بابر اعظم کے علاوہ شاداب خان، فخر زمان، حارث رؤف اور حسن علی شامل ہیں،افتخاراحمد، امام الحق، محمد رضوان، سعود شکیل، شاہین آفریدی، عثمان قادر اور زاہد محمود بھی 12 رکنی سکواڈ کا حصہ ہیں۔

خیال رہے کہ پاکستان اور نیوزی لینڈ کے درمیان ون ڈے سیریز 17 ستمبر سے راولپنڈی میں شروع ہو گی۔