پنجاب حکومت کا  بلدیاتی اداروں کو فعال کرنے کا فیصلہ 

تفصیلات کے مطابق  وزیر اعلی پنجاب  عثمان بزدار کی زیر صدارت اعلی سطح کا اجلاس  ہوا ، جس میں  پنجاب کے بلدیاتی اداروں کو فعال کرنے کا فیصلہ  کیا گیا ہے۔

ذرائع کا کہنا ہے کہ  پنجاب حکومت ایڈمنسٹریٹرز کے تقرر کا نوٹیفیکیشن واپس لے لے گی  جبکہ  نئے نوٹیفیکیشن کا اجرا آج شام تک متوقع  ہے، محکمہ بلدیات ایڈمنسٹریٹر کی دست برداری کا نوٹیفیکیشن جاری کرے گا۔

ذرائع کے مطابق  بلدیاتی نمائندوں کی بحالی کے بعد  تعینات ایڈمنسٹریٹر کو ہٹانے کا فیصلہ کرلیا گیا،  پنجاب میں   اڑھائی سال سے ایڈمنسٹریٹر تعنیات ہیں۔  میٹرو پولیٹن کارپوریشن لاہور میں کرنل(ر)  مبشر جاوید مئیر کا چارچ سنبھال چکے ہیں۔

خیال رہے کہ 26مار چ2021 کو سپریم کورٹ نے پنجاب میں بلدیاتی ادارے بحال کرنے کا حکم دیا تھا ۔ عدالت نے بلدیاتی ایکٹ کے سیکشن 3 کو آئین سے متصادم قرار دیا  تھا۔

یاد رہے کہ پنجاب میں  سابقہ بلدیاتی نظام تحلیل کردیا گیا تھا جس کے بعد تمام میٹرو پولیٹن کارپوریشنز اور یونین کونسلز ختم ہو گئی تھیں۔ نئے بلدیاتی نظام کے تحت ایڈمنسٹریٹرز تعینات کیے گئے تھے۔