خیبرپختونخوا میں ڈینگی کیسز میں اضافہ

محکمہ صحت کے مطابق صوبے میں مجموعی طور پرڈینگی سے متاثرہ افراد کی تعداد5ہزار242 تک جا پہنچی ہے ۔ پشاورمیں گزشتہ چوبیس گھنٹوں کے دوران623 افراد میں ڈینگی وائرس کی تصدیق ہوئی ، اسپتالوں میں مجموعی طور پر ڈینگی کے214 مریض زیرعلاج ہیں ۔محکمہ صحت کے مطابق پشاورمیں مجموعی طور پرڈینگی سے متاثرہ مریضوں کی تعداد 2266 ہوگئی۔ 

دوسری جانب ملک کے دوسرے شہروں میں بھی ڈینگی کے وار جاری ہیں ،   صوبائی دارالحکومت لاہور کے 3بڑے اسپتالوں میں ڈینگی کے مریضوں کے لئے جگہ ختم ہوگئی ، گنگارام اسپتال،سروسز اور جناح اسپتال کے تمام بیڈز ڈینگی کے مریضوں سے بھرگئے ۔

حیدرآباد کے  سول اسپتال میں ڈینگی سے متاثرہ دو مریض جاں بحق ہوگئے ۔ اسپتال انتظامیہ کے مطابق  مجموعی طور پر اموات کی تعداد 5 ہو گئی ہے جبکہ سول اسپتال میں 11 مریض زیر علاج ہیں۔ حیدرآباد میں مجموعی طور پر ڈینگی سے متاثرہ افراد کی تعداد 145 ہوگئی ۔ 

خیال رہے کہ پاکستان میں ڈینگی کا پہلا کیس 1994 ء میں کراچی میں سامنے آیا لیکن بڑے پیمانے پر ڈینگی بخار 2010ء اور 2011ء میں نمودار ہوا۔ ایک محدود اندازے کے مطابق 2011ء میں 370 کے قریب  مریض جان سے ہاتھ دھو بیٹھے جبکہ 15ہزار افراد اس سے متاثر ہوئے ۔