امریکا ، اقوام متحدہ کا پاک بھارت جنگ بندی سےمتعلق پیشرفت کاخیرمقدم

ترجمان وائٹ ہاؤس جین ساکی کاکہنا ہے کہ جنوبی ایشیا میں وسیع ترامن اور استحکام ہم سب کےمفاد میں ہے ۔ پاکستان اور بھارت کے درمیان ا یل او سی پر جنگ بندی جنوبی ایشیامیں امن اوراستحکام کیلئےمثبت پیشرفت ہے ۔ہم  اس پیشرفت کو آگے بڑھانے کیلئےدونوں ملکوں کی حوصلہ افزائی کرتےہیں۔ دوسری جانب اقوام متحدہ کے سیکرٹری جنرل انتونیوگوتریس نےکہا ہے کہ پاک بھارت معاہدہ مثبت اقدام ہے، امیدہے دونوں ممالک  کے درمیان  مزید بات چیت کی راہ ہموارہوگی۔

واضح رہے کہ گزشتہ روز پاکستان اور بھارت کے ڈی جی ایم او کا ہاٹ لائن پر رابطہ کیا گیا ، جس میں دونوں افسران کے درمیان ایل او سی کی صورتحال پر تبادلہ خیا ل کیا گیا ۔

پاک فوج کے شعبہ تعلقات عامہ (آئی ایس پی آر) کے ترجمان میجر جنرل بابر افتخار کے مطابق دونوں ڈی جی ایم اوز کے درمیان بات چیت اچھے ماحول میں ہوئی۔جس میں دونوں افسران کے درمیان ایل او سی کی صورتحال پر تبادلہ خیا ل کیا گیا ہے۔ڈی جی آئی ایس پی آر نے بتایاکہ 1987سے پاکستان اور بھارت کے درمیان ہاٹ لائن پر رابطہ ہے اور دونوں ڈی جی ایم او یوز رابطہ کرتے رہتے ہیں ،2003 میں ایک اور انڈرسٹینڈنگ رہی جس کے بعد یہ بہت افیکٹ کرتا تھا ۔  بھارت اور پاکستان نے اتفاق کیا ہے کہ 2003 میں جو اتفاق ہوا تھا اس پر عمل کیا جائے ۔