پاکستان اور قطر کے درمیان ایل این جی معاہدہ طے پا گیا

جی این این کے مطابق پاکستان اور قطر کے درمیان ایل این جی معاہدہ دس سال کے لیے طے پایا ہے۔ نئے معاہدے کے تحت 1.2 ایل این جی کارگوز چار ماہ میں درآمد ہوں گے، ذرائع کے مطابق مسلم لیگ ن کے دور میں قطر سے 13.37 فیصد برینٹ کا معاہدہ طے پایا تھا، نئے معاہدے کے تحت زیادہ سے زیادہ 1.2  بی سی ایف ایل این جی کے 4 کارگو ایک مہینے میں درآمد ہوں گے۔ 

دوسری جانب وزیر اعظم عمران خان نے لاہور میں سینٹرل بزنس ڈسٹرکٹ کے سنگ بنیاد کی تقریب سے خطاب کرتے ہوئے اعلان کیا کہ قطر کیساتھ ایل این جی کا نیا معاہدہ طے ہوگیا ہے ، جس سے 300ملین ڈالر کی بچت ہوگی۔ انہوں نے کہا کہ پچھلے ایک سال سے قطر کیساتھ معاہدے کی کوشش کررہے تھے۔

سینٹرل بزنس ڈسٹرکٹ کے سنگ بنیاد رکھتے ہوئے وزیر اعظم نے کہا کہ اس پراجیکٹ کا سنگ بنیاد رکھتے ہوئے خوشی محسوس ہورہی ہے، وزیراعظم نے کہا سینٹرل بزنس ڈسٹرکٹ کامنصوبہ پیسہ جنریٹ کرے گا، پہلے فیز میں 1300ارب روپے جنریٹ ہوں گے ، والٹن ایئرپورٹ ڈی نوٹیفائی ہوگا تو اطراف کاعلاقہ معاشی حب بن سکے گا۔

ان کا کہنا تھا کہ لاہور کو پھیلنے سے روکنے کیلئے اونچی عمارتوں کی طرف جانا ہوگا، لاہور اتنی تیزی سے پھیلا ہے کہ منفی اثرات سامنے آرہےہیں، یہاں سب سے بڑا مسئلہ صاف پانی کی قلت کا سامنا ہے، دوسرا مسئلہ سیوریج کا ہے جونیچے سندھ تک جارہاہے ، راوی سردیوں میں سکڑنے کی وجہ سے سیوریج کا نالا بن جاتاہے جبکہ دنیا میں ماڈرن شہر اوپرجاتے ہیں۔انھوں نے مزید کہا والٹن ایئرپورٹ ڈی نوٹیفائی ہونےسے کمرشل سرگرمیاں 6ہزار ارب تک جاسکیں گی ، راوی سٹی سے بھی پورے پاکستان کو فائدہ ہوگا۔

وزیراعظم کا کہنا تھا کہ کہا جارہاہے کہ یہاں درخت کٹ رہےہیں ، کسی نے آج تک پاکستان میں درخت لگانے کا نہیں سوچا تھا ، پاکستان کی تاریخ کا سب سے بڑا انوائرمنٹلسٹ اپنے آپ کو سمجھتاہوں، بچپن میں چھانگا مانگا، چیچہ وطنی اور دنیاپور کے ریسٹ ہاؤس میں گیا ہوں ، بڑے بڑے جنگل ختم ہوگئے ،زمینوں پر قبضے ہوگئے، لاہور میں کوئی درخت نہیں کٹے گا جسے ہٹانا پڑا اس کی جگہ تبدیل کردیں گے۔