شعیب ملک کا بھارتی ٹیم کی شکست پر تبصرے سے گریز

تفصیلات کے مطابق شعیب ملک نے ورچوئل پریس کانفرنس کرتے ہوئے کہا ہے کہ حسن علی فائٹر ہے وہ کم بیک کرے گا، ایک دو میچز میں پرفارمنس نہیں ہوئی تو کوئی زیادہ بڑی بات نہیں ہے جب کہ بابر اعظم کی کپتانی میں نکھار آتا جارہا ہے، بابر کی سب سے اچھی بات یہ ہے کہ کپتانی میں بیٹنگ کا پریشر نہیں لے رہے۔

شعیب ملک نے بھارتی ٹیم کی شکست پر تبصرے سے گریز کرتے ہوئے کہا ہے کہ کسی دوسری ٹیم کی شکست پر کوئی تبصرہ نہیں کرنا چاہتا۔

ان کا کہنا تھا کہ ہمارا فوکس پاکستان ٹیم اور میچز پر ہے، ٹیم مینجمنٹ نے واضح کیا ہے کہ اپنا فوکس صرف اپنے شاٹ پر رکھیں، نتائج آپ خود نہیں دے سکتے، مینجمنٹ کے اعتماد سے کھلاڑیوں پر دباؤ کم ہوا۔

ان کا مزید کہنا تھا کہ مسلسل جیت سے پاکستانی ٹیم کا مورال اس وقت بہت بلند ہے، کھلاڑیوں نے پریکٹس سیشن میں بہت محنت کی جو رنگ لارہی ہے۔