رواں مالی سال پاکستان میں پٹرول کی قیمت میں کتنا اضافہ ہوا ؟ 

عالمی وبا کورونا کے آغاز سے  تیل کی قیمتوں کا مسئلہ عوام کی توجہ سے ہٹتا ہوا نظر آیا تھا کیونکہ سال  2020 میں وبا کی شروعات کے بعد سے اور 2021 کے کچھ مہینوں میں تیل کی قیمتیں کم تھیں لہٰذا اس وقت ایندھن کے ٹینک کو بھرنا تشویش کی بات نہیں تھا ۔ تاہم اب لاکھوں گاڑیاں چلانے والے پیٹرول اور ڈیزل بھرواتے وقت اپنی جیبوں کو بھی دیکھتے ہیں۔ یہی نہیں پاکستان میں تیل کی قیمتوں میں اضافے کے باعث مہنگائی میں بھی اضافہ دیکھنے میں آتا ہے۔

رواں مالی سال کے دوران بجلی ،اشیائے خوردنوش کے ساتھ پٹرول کی قیمت میں یکے بعد دیگرے ہوشربا اضافی دیکھنے میں آیا ہے ۔  میڈیا رپورٹس کے مطابق حکومتی دستاویزات کے مطابق  مالی سال 2021-22 میں اب تک پیٹرول 35 روپے 13 پیسے فی لیٹر مہنگا ہو چکا ہے۔ یکم جولائی سے اب تک ڈیزل کی قیمت میں  30 روپے 7 پیسے فی لیٹر اضافہ ہوا جبکہ مٹی کا تیل 34 روپے 64 پیسے مہنگا ہو چکا ہے۔

دستاویزات کے مطابق یکم جولائی سے اب تک لائٹ ڈیزل آئل 34 روپے 36 پیسے مہنگا ہو چکاہے ۔ 

یاد رہے کہ وزیراعظم عمران خان نے  بدھ کی شام قوم سے خطاب میں وزیراعظم عمران خان نے خبردار کیا تھا کہ ملک میں پیٹرول کی قیمتیں مزید بڑھانی پڑیں گی۔ رات گئے پیٹرول کی قیمت میں 8 روپے سے زائد کا اضافہ کر دیا گیا ہے۔  

وزارت خزانہ  کا اس حوالے سے موقف یہی ہے کہ حکومت نے عالمی منڈی میں تیل کی بڑھتی قیمتوں کے باعث پیدا ہونے والے دباؤ کا سامنا کیا اور صارفین کے لیے زیادہ سے زیادہ ریلیف' فراہم کرنے کی کوشش کی ہے ۔