پیپلزپارٹی نے پارلیمان کے مشترکہ اجلاس  کے موخر کرنے کو حکومت کی بزدلی قرار دیدیا

تفصیلات کے مطابق پاکستان پیپلزپارٹی پارلیمنٹرینز کی مرکزی سیکریٹری اطلاعات شازیہ مری  نے  پارلیمان کے مشترکہ اجلاس سے بھاگنے پر حکومت پر کڑی تنقید کی ہے۔

شازیہ مری نے کہا کہ  پیشگی اپنی شکست دیکھ کر حکومت نے پارلیمان کا مشترکہ اجلاس مؤخر کرکے راہِ فرار اختیار کرلی، پارلیمان میں دو مرتبہ عددی اعتبار سے شکست کے بعد حکومت کا پارلیمان کے مشترکہ اجلاس سے بھاگنا بوکھلاہٹ کا ثبوت ہے،  وزیراعظم پارلیمان میں اپنی اہمیت کھوچکے ہیں، حکومتی اراکین تک کی مکمل حمایت عمران خان کو دستیاب نہیں۔

رہنما پی پی  شازیہ مری نے کہا کہ  پی ٹی آئی کے اراکین پارلیمان خود حکومت سے بیزار ہوچکے ہیں، اب عمران خان کا چل چلاؤ ہے،  عمران خان نہ عوام کا سامنا کرسکتے ہیں اور نہ پارلیمان میں عوامی نمائندوں کا۔

قبل ازیں  حکومت نے پارلیمنٹ کا مشترکہ اجلاس موخر کردیا تھا۔ فواد چوہدری  کا کہنا تھا کہ   انتخابی اصلاحات ملک کے مستقبل کا معاملہ ہے، ہم نیک نیتی سے کوشش کر رہے ہیں کہ ان معاملات پر اتفاق رائے پیدا ہو اس سلسلے میں اسپیکر اسد قیصر کو اپوزیشن سے ایک بار پھر رابطہ کرنے کا کہا گیا ہے،تا کہ ایک متفقہ انتخابی اصلاحات کا بل لایا جا سکے۔  پارلیمان کے مشترکہ اجلاس کو اس مقصد کیلئے مو خر کیا جا رہا ہے۔