سرکاری سکولوں میں قرآن مجید کے کورس کا پرچہ لینے کا فیصلہ 

جی این  این کے مطابق پہلی تا پانچویں جماعت تک کے طلبہ کا ناظرہ قرآن کا امتحان ہوگا ، پرائمری جماعت کے طلباء کو 50 نمبروں پر مشتمل ناظرہ  قرآن  کا پرچہ دینا ہوگا ۔

 پرائمری جماعت کے طلبہ کا اسلامیات کا پرچہ الگ سے 100 نمبروں پر مشتمل ہوگا ۔ 

غیر مسلم طلبہ  سے 100 نمبروں پر محیط اخلاقیات کا پرچہ لیا جائے گا ۔ 

 پرائمری جماعت میں ناظرہ قرآن کا پرچہ آئندہ برس 2022ء کے امتحانات میں ہوگا۔ 

پنجاب کے تمام اضلاع کی ایجوکیشن اتھارٹیز کے سربراہان کو ناظرہ قرآن کے پرچے سے متعلق احکامات جاری کر دئیے گئے ہیں ۔ 

یاد رہے  کہ جولائی 2021  میں  پنجاب  حکومت نے سکولوں، کالجوں اور مدارس میں قرآن کو ایک علیحدہ لازمی مضمون کے طور پر پڑھانے کے حوالے سے تعلیمی اداروں کو ہدایات بھی جاری کی تھیں۔ 

پنجاب کریکولم اینڈ ٹیکسٹ بک بورڈ (پی سی ٹی بی) کے مطابق حکومتِ پنجاب نے لازمی تدریسِ قرآن مجید ایکٹ 2018 کے ذریعے صوبہ بھر کے تمام تعلیمی اداروں بشمول نجی، سرکاری اور دینی مدارس کے مسلم طلبا کے لیے قرآنِ مجید کی تدریس کو لازم قرار دیا تھا۔

پنجاب کریکولم اینڈ ٹیکسٹ بک بورڈ (پی سی ٹی بی) کی جانب سے جاری کردہ اعلامیے کے مطابق پہلے مرحلے میں پہلی سے پانچویں جماعت تک سکولوں میں ناظرہ قرآن کی تعلیم دی جائے گی جبکہ چھٹی جماعت سے بارہویں جماعت تک ترجمے کے ساتھ قرآن پڑھایا جائے گا ۔