بھارتی کرکٹر ہربھجن سنگھ بھی محمد رضوان کے مداح نکلے

تفصیلات کے مطابق بھارتی کرکٹر ہربھجن سنگھ کا کہنا ہے کہ رضوان کی ہی وجہ سے بابر اعظم کھل کر کھیلتے ہیں۔

اپنے یو ٹیوب چینل پر ٹی ٹوئنٹی ورلڈکپ کے سیمی فائنل میچز پر تبصرہ کرتے ہوئے ہربھجن سنگھ کا کہنا تھا پاکستان نے آسٹریلیا کے خلاف بہت اچھا اسکور کیا تھا۔

ان کا کہنا تھا کہ پاکستان میچ جیت سکتا تھا لیکن شاید فیصلوں میں کہیں تھوڑی غلطی ہو گئی اور پاکستان اپنے اعصاب پر قابو نہ رکھ سکا جس کی وجہ سے میچ آسٹریلیا جیت گیا۔

ہربھجن سنگھ کا کہنا تھا آسٹریلیا کے خلاف بابر اعظم اور محمد رضوان نے بڑا تگڑا اسٹارٹ کیا، دونوں بہت ہی شاندار ہیں لیکن بدقسمتی سے بابر 39 رنز بنا کر آؤٹ ہو گیا تاہم رضوان نے پورے ٹورنامنٹ میں آؤٹ اسٹینڈنگ بلے بازی کی۔

محمد رضوان کو کریڈٹ دیتے ہوئے ہربھجن سنگھ کا مزید کہنا تھا کہ اس کلینڈرائیر میں 1000 رنز بنا لیے ہیں، وہ خود کو کمال کے اوپنر کے طور پر سامنے لائے ہیں اور اتنے رنز بنانا قابل تعریف ہے، ویلڈن رضوان۔