چین: گھروں کی قیمت میں نمایاں کمی 

غیرملکی خبررساں ادارے کی ایک رپورٹ کے مطابق جنوری سے اکتوبر تک ہونے والی نئی تعمیرات میں بھی گزشتہ سال کے مقابلے میں 7.7 فیصد کمی واقع ہوئی ہے۔

چین میں رئیل اسٹیٹ کی بڑی کمپنی ایورگرینڈ اپنے بھاری قرضوں پر سود کی ادائیگی جاری رکھنے کے لیے جدوجہد کر رہی ہے ۔ جس کے سبب حالیہ مہینوں میں پراپرٹی مارکیٹ پر کافی اثرات مرتب ہوئے ہیں  ۔ اکتوبر میں نئے گھروں کی قیمتوں میں 0.2 فیصد کمی ہوئی جوکہ فروری 2015 کے بعد چین میں آنے والی سب سے بڑی کمی تھی۔

چین کی پراپرٹی مارکیٹ ملک کی اقتصادی سرگرمیوں کا تقریباً ایک چوتھائی حصہ سے ہے اس وقت بڑے پراپرٹی ڈویلپرز بھاری قرضوں کی ادائیگیوں میں پھنسے ہوئے ہیں۔

چین میں رئیل اسٹیٹ کی سب سے بڑی کمپنی ایورگرینڈ پر تقریباً300 بلین ڈالر کا قرض ہے۔ یہ کمپنی حال ہی میں ڈیفالٹ ہو تے  ہوتے رہ گئی اور اس نے میڈیا فرم ہینگ ٹین نیٹ ورکس میں اپنے5.7 فیصد حصص145 ملین ڈالر میں فروخت کرکے قرض پر سود کی ادائیگی کی ہے۔ اس کمپنی نے گزشتہ ہفتے برطانیہ میں اپنا کار سازی کا کاروبار فروخت کیا تھا تاہم اس کی رقم معلوم نہیں ہوسکی۔

چین میں ریئل اسٹیٹ کی دوسری کمپنیاں بھی قرض کی ادائیگی کے لیے کوشش کر رہی ہیں۔ ڈویلپر فینٹاسیا نے اکتوبر میں 205.7 ملین ڈالر کی ادائیگی کرنی ہے اور اس کمپنی کے حصص کی قیمت بھی گزشتہ ہفتے50 فیصد گر گئی تھی۔

چین نے اپنی پراپرٹی مارکیٹ میں  ہونیوالے اتار چڑھاؤ کے باعث پچھلے سال ڈویلپرز پر قرض لینے پر پابندی لگانے والے اقدامات متعارف کرائے تھے تاہم گزشتہ ہفتے سے  سرکاری میڈیا کی رپورٹس نے اس سیکٹر میں  ممکنہ نرمی کا عندیہ دیا تھا۔