امریکی ڈالر مزید 40 پیسے سستا ہو گیا

عالمی مالیاتی ادارے (آئی ایم ایف) سے ممکنہ معاہدے کی امید، بیرون ملک اوور سیز پاکستانیوں کی جانب سے ریکارڈ ترسیلات زر اور سعودی عرب کی طرف سے اربوں ڈالرز کی ملنے والی امداد جلد موصول ہونے کی اطلاعات کے باعث روپے کے مقابلے میں مسلسل دوسرے روز امریکی ڈالر سستا ہو گیا۔

سٹیٹ بینک آف پاکستان کی سماجی رابطے کی ویب سائٹ ٹویٹر پر جاری کردہ اعداد و شمار کے مطابق رواں ہفتے کے دوسرے کاروباری روز کے دوران روپے کے مقابلے میں امریکی ڈالر مزید 40 پیسے سستا ہو گیا اور قیمت 175 روپے 29 پیسے سے کم ہوکر 174 روپے 89 پیسے ہو گئی ہے۔

Interbank closing #ExchangeRate for today:https://t.co/hJTSKiLxIW pic.twitter.com/UjOioBTipZ

— SBP (@StateBank_Pak) November 16, 2021

واضح رہے کہ گزشتہ روز روپے کے مقابلے ڈالر کی قیمت 44 پیسے گر ئی تھی اور نئی قیمت 175 روپے 29 پیسے پر بند ہوئی تھی۔

یاد رہے کہ 12 نومبر کو انٹربینک میں ڈالر تاریخ کی بلند ترین سطح 175 روپے 73 پیسے پر بند ہوا تھا۔

معاشی ماہرین کا کہنا ہے کہ وزیراعظم عمران خان کے مشیر برائے خزانہ شوکت ترین مسلسل چند روز سے میڈیا کے ذریعے عوام کو آگاہ کر رہے ہیں کہ عالمی مالیاتی ادارے (آئی ایم ایف) سے معاہدے کے قریب پہنچ گئے ہیں جس کے باعث ممکنہ معاہدے کی اطلاعات نے امریکی ڈالر کی قدر کو گراوٹ میں دھکیل دیا ہے جبکہ سعودی عرب سے ملنے والی تین ارب ڈالرز کی امداد کی بھی جلد پاکستان منتقلی اور بیرون ملک پاکستانیوں کی طرف سے ریکارڈ ترسیلات زر موصول ہونے کے باعث بھی روپے کی بحالی کا سفر شروع ہو گیا ہے۔