سانحہ مہران ٹاون کیس:  ملزمان اور ورثا کے درمیان دیت کی رقم کی ادایئگی کے معاملات طے پاگئے

تفصیلات کے مطا بق  سانحہ مہران ٹاون کیس میں ملزمان اور ورثا کے درمیان دیت کی رقم کی ادایئگی کے معاملات طے پاگئے ہیں،  حادثے میں جاں بحق 7 افراد کے ورثا نے دیت کی رقم کے شیڈول پر آمادگی ظاہر کردی ہے۔ جاں بحق 9 افراد کے اہل خانہ کی جانب سے صلح کا حلف نامہ پہلے ہی عدالت میں جمع کروایا جاچکا ہے۔

ورثا کا کہنا ہے کہ  عدالت کی جانب سے 42 لاکھ روپے فی کس دیت طے کی گئی تھی۔ ہر چھ ماہ بعد چار لاکھ روپے ادا کئے جائیں گے، دو سال کے دوران دیت کی تمام رقم ادا کی جائے گی۔ دیت کی ادایئگی کے لئے کل ڈپٹی کمشنر کورنگی کے دفتر پر کاغذات پر دستخط کئے جائیں گے۔

دیت کی رقم مکان مالک اور فیکٹری مالک ادا کریں گے،  فیکٹری مالک حسن مہتا 60 فیصد جبکہ مکان مالک طارق فیصل 40 فیصد رقم ادا کرے گا،  ابتدائی طور پر دس دس لاکھ روپے کے چیک ورثا کو دیئے جائیں گے۔

عدالت نے ملزمان کی درخواست ضمانت کی سماعت 18 نومبر تک ملتوی کردی ہے۔