پارلیمنٹ کا مشترکہ اجلاس، اپوزیشن کا حکومتی آرڈیننسز کو مسترد کرانے کا فیصلہ

تفصیلا ت کے مطا بق  حکومت اور اپوزیشن آمنے سامنے آگئے ہیں ،پارلیمنٹ کے مشترکہ اجلاس میں  اپوزیشن نے حکومتی آرڈیننسز کو مسترد کرانے کا فیصلہ کرلیا ہے، اپوزیشن  نے آرڈیننسز کو مسترد کرانے کے لئے قرارداد جمع کرانے کا فیصلہ کرلیا۔ سینیٹر شیری رحمان اور سینیٹر حاجی ہدایت اللہ سیکرٹری سینیٹ کے آفس پہنچ گئے ہیں۔

اپوزیشن نے نیب آرڈیننس کو مسترد کروانے کیلئے قرارداد جمع کروا دی،  قرارداد پر تمام اپوزیشن جماعتوں کے دستخط موجود ہیں۔

خیال رہے کہ متحدہ قومی موومنٹ پاکستان نے پارلیمنٹ کے مشترکہ اجلاس میں حکومت کی حمایت کا فیصلہ کر لیا ہے۔  وفاقی وزیر برائے انفارمیشن ٹیکنالوجی امین الحق کا کہنا تھا کہ  ایم کیو ایم پارلیمنٹ کے مشترکہ اجلاس میں قانون سازی پر حکومت کی حمایت کرے گی اور یہ فیصلہ رابطہ کمیٹی سے مشاورت کے بعد کیا گیا۔

گزشتہ روز ق لیگ  نےحکومت کی حمایت جاری رکھنے کا فیصلہ کیا تھا، سپیکر پنجاب اسمبلی چودھری پرویزالہٰی نے حکومت کی حمایت کے فیصلے کی منظوری دی جبکہ مسلم لیگ ق کی پارلیمانی پارٹی نے تحفظات کے اظہار کےبعد فیصلوں کا اختیار پرویزالہٰی کو دیا تھا۔

وزیراعظم کی اتحادی جماعتوں کےاجلاس میں وفاقی وزیر مونس الہٰی اورطارق بشیر چیمہ نے شرکت کی جبکہ اس موقع پر چودھری مونس الہٰی نے کہا کہ مسلم لیگ ق پارلیمنٹ کے مشترکہ اجلاس میں قانون سازی کو سپورٹ کرے گی ۔