بابا گورو نانک کے 552 ویں جنم دن  کی تقریبات شروع

سکھ مذہب کے بانی بابا گرو نانک دیو جی کے 552 جنم دن کی تقریبات کل گردوارہ کرتارپور کمپلیکس میں شروع ہوں گی۔  بھارت اور دنیا بھر میں رہنے والے  8ہزار  سکھ یاتری تقریب میں شرکت کیلئے پاکستان پہنچ رہے ہیں۔

 دس افغان سکھ یا تریوں کا وفد طورخم سرحد عبور کرکے آج پشاور پہنچا۔ پاکستان میں قیام کے دوران سکھ یاتری ننکانہ صاحب میں گردوارہ جنم استھان اور کرتارپور میں گردوارہ دربار صاحب سمیت مختلف گردواروں میں مذہبی رسومات اداکریں گے ۔  سی ای او کرتارپور راہداری محمد لطیف کے مطابق یاتریوں کو کورونا ٹیسٹ کے بعد دربار لایا جائے گا۔صدر سکھ پر بندھک کمیٹی سردار امیر سنگھ یاتریوں کا استقبال کریں گے۔

ہر سال ہزاروں سکھ یاتری سکھ مذہب کے بانی گرو نانگ کی سالگرہ کی تقریبات میں شرکت کے لیے پاکستان آتے ہیں۔ مرکزی تقریب گرو نانک کی جائے پیدائش پاکستانی پنجاب کے ضلع ننکانہ صاحب میں واقع گردوارہ جنماستھن میں میں منعقد ہوتی ہے ۔ اس سال کی تقریبات کا آغاز 17 نومبر کو ہوگا جبکہ مرکزی تقریب 19 نومبر کو ننکانہ صاحب منعقد ہوگی۔

واضح رہے کہ سکھ ثقافت کا ایک بڑا حصہ پاکستان میں پایا جاتا ہے۔ اس میں کرتارپور میں واقع گردوارہ دربار صاحب شامل ہے، جوکہ سکھ برادری کے لیے اہمیت کا حامل ہے، کیونکہ یہ گرو نانک کو خراج عقیدت پیش کرنے کے لیے بنایا گیا تھا۔

گرو نانک نے 1515 میں کرتارپور کا علاقہ قائم کیا تھا اور وہی ان کا آخری آرام گاہ بھی ہے ۔ نومبر 2019 میں پاکستان نے کرتارپور راہداری کھول کر گردوارہ دربار صاحب تک بغیر ویزہ رسائی کی سہولت کا آغاز کیا تھا۔اس سے  بھارت میں سکھ افراد کو کرتارپور تک بغیر ویزے کے رسائی حاصل ہوئی ہے ۔

9 نومبر 2019 کو اس راہداری کے کھلنے سے 1947 کے بعد پہلی باربھارتی  سکھ یاتری بغیر ویزہ کے پاکستان داخل ہو ئے  تھے۔