لاہور میں سموگ کا راج ،عدالت کا نجی اداروں کے ملازمین کوگھرسے کام کرنےکاحکم

جمعرات 18 نومبر کو لاہور ہائیکورٹ میں جسٹس شاہد کریم نے شہری فاروق کی درخواست پر سماعت کی۔ درخواست گزار کی جانب سے شیراز ذکا ایڈووکیٹ پیش ہوئے۔

لاہور ہائی کورٹ کے جسٹس شاہد کریم نے نجی اداروں کے 50 فیصد ملازمین کو گھر سے کام کرنے کا حکم دیا۔جسٹس شاہد کریم نے فیصلہ سناتے ہوئے کہا کہ اس سلسلے میں حکومت پنجاب فوری طور پر نوٹیفکیشن جاری کرے۔یہ فیصلہ لاہور ڈویژن کے اطراف ان علاقوں پر نافذ کرنے کا حکم دیا گیا ہے جہاں اسموگ کی شرح خطرناک حد تک بڑھ گئی ہے۔

جسٹس شاہد کریم نے ریمارکس دیے کہ لاہور، گوجرنوالہ سمیت دیگر اضلاع سے متعلق روزانہ کی بنیاد پر میٹنگ کی جائے اور اسموگ پر قابو پانے کے لیے ہرممکن اقدامات کیے جائیں۔

اس کے علاوہ ڈی جی محکمہ ماحولیات علی اعجاز سمیت دیگر افسران عدالت میں پیش ہوئے۔ جوڈیشل واٹرکمیشن کی جانب سے 5 صفحات پر مشتمل رپورٹ عدالت میں پیش کی گئی۔ فوکل پرسن سید کمال حیدر نے رپورٹ جمع کروائی۔

ہائیکورٹ میں جوڈیشل واٹرمالیاتی کمیشن کی جانب سے اسکول بند کرنے کی سفارش کی گئی تاہم ہائی کورٹ نے تعلیمی ادارے بند کرنے کی تجویز سے اتفاق نہیں کیا۔

 ہائی کورٹ میں اسموگ ایمرجنسی پلان پیش کردیا گیا جبکہ عدالت نے ٹریفک پلان طلب کرلیا۔عدالت نے ٹریفک ایمرجنسی لائن قائم کرنے کا حکم دے دیا۔

جسٹس شاہد کریم نے ریمارکس دئیے کہ ٹریفک ایمرجنسی کےلیے کالنگ لائن قائم کی جائے تاکہ ایمرجنسی نمبر پر شدید ٹریفک جام کی شکایت کی جاسکے۔