ناظم جوکھیو قتل کیس : ناظم جوکھیو کے بھائی افضل جوکھیو نے جام عبدالکریم کو کلین چٹ دے دی 

تفصیلات کے مطابق  ناظم جوکھیو قتل کیس بڑی پیش رفت ہوئی ہے، ناظم جوکھیو کے بھائی افضل جوکھیو نے جام عبدالکریم کو کلین چٹ دے دی ہے، پوری کہانی میں جام عبدالکریم کو بے قصور قرار دے دیا گیا،  کہا گیا اس قتل سے جام عبدالکریم کا کوئی تعلق نہیں ہے۔

 افضل جوکھیو نے مجسٹریٹ کے سامنے 164 کا بیان ریکارڈ کرا دیا ہے ،  بیان میں جام اویس سمیت دیگر ملزمان کا ذکر کیا گیا ، 164کا بیان کسی بھی کیس میں انتہائی اہم سمجھا جا تا ہے،  جام عبدالکریم نے کیس میں نام آنے کے بعد حفاظتی ضمانت کرا رکھی تھی۔

چند روز قبل ناظم جوکھیوکے موبائل فون اور کپڑے جام ہاؤس کے قریب کنویں سے مل گئے تھے۔ تفتیشی حکام کا کہنا تھا کہ   قتل کے بعد موبائل اور کپڑے کنویں میں پھینک کر آگ لگا دی گئی تھی۔زیرحراست ملزموں کی نشاندہی پر تفتیشی ٹیم کنویں تک پہنچی۔ موبائل فون کافی حد تک جل چکا ہے ، موبائل اور کپڑے فرانزک کے لیے پنجا ب لیبارٹری بھیجے جائیں گے۔ لیبارٹری رپورٹ آنے پر تفتیش میں پیش رفت ہوگی۔