شامی فوج نے دمشق میں اسرائیلی میزائل حملہ ناکام بنا دیا

عرب میڈیا کے مطابق اتوار کے روز  دمشق کی طرف گولان کی جانب سے   اسرائیلی  افواج نے میزائلوں سے حملہ کیا جس کو میزائیل دفاعی نظام کے باعث ناکام بنادیا گیا،اسرائیلی  افواج نے  زمین سے زمین پر مار کرنے والے متعدد میزائیل فائر کیے تاہم شامی افواج نے تمام میزائیلوں کو ہوا میں ہی تباہ کردیا۔

شام کے سرکاری میڈیا کے مطابق دارالحکومت دمشق میں زورداردھماکوں کی آوازیں سنی گئیں ۔ سرکاری میڈیا نے فضائی دفاع کی فائرنگ کی فوٹیج  بھی نشر کی ، جس میں  رات کے  وقت روشن  آسمان  فائرنگ سے گونجتا دکھائی دے رہا ہے ۔

دفاعاتنا الجوية تتصدى لصواريخ معادية في سماء مدينة #دمشق pic.twitter.com/3bMSXrUQdV

— الاخبارية السورية (@alikhbariasy) February 28, 2021

 شام میں 2011 میں شروع ہونے والی خانہ جنگی کے دوران اب تک اسرائیل نے سیکڑوں فضائی اور میزائل حملے کیے ہیں اور ان حملوں میں ایرانی اور لبنانی حزب اللہ کے ساتھ ساتھ شامی حکومتی فورسز کو نشانہ بنایا گیا۔

خیال رہے کہ شام میں 2011 میں حکومت کے خلاف مظاہروں سے شروع ہونے والی خانہ جنگی میں اب تک ایک اندازے کے مطابق 3 لاکھ 70 ہزار سے زائد افراد مارے جاچکے ہیں جبکہ لاکھوں کی تعداد میں لوگ بے گھر ہوئے اور بہت سے لوگ نقل مکانی کرچکے ہیں۔

واضح رہے کہ گزشتہ ماہ اسرائیل نے شام کے مشرقی علاقے  پر بدترین فضائی کارروائی کی تھی جس میں   57 افراد ہلاک ہوئے تھے اس   حملے  میں حکومتی افواج سمیت دیگر افراد بھی شامل تھے ۔  خبر ایجنسی 'اے ایف پی' کی رپورٹ کے مطابق انسانی حقوق کی تنظیم سیرین آبزرویٹری کا کہنا تھا کہ اسرائیلی فورسز نے عراقی سرحد سے متصل مشرقی علاقے دیرالزور میں مختلف مقامات میں 18 حملے کیے.