یہ حکومت عام آدمی کی زندگی اجیرن کرنے کا دوسرا نام ہے:شہباز شریف

تفصیلات کے مطابق شہباز شریف کا کہنا تھا کہ شرح سود میں اضافہ اندھی حکومت کا ایک اور اندھا دھند تباہ کن اقدام ہے،پاکستان پر سالانہ مزید 400 ارب سود کی اضافی ادائیگی لاد دی گئی ہے ۔

رہنما مسلم لیگ ن کا کہنا تھا کہ نجی شعبے کو بھی 100 ارب روپے سود کی مد میں زیادہ ادا کرنا پڑیں گے،حکومت خوش گمانی میں مبتلا ہے کہ بڑھتی مہنگائی اور روپے کی بے قدری کو شاید روک لیا جائے۔

شہباز شریف کا کہنا تھا کہ اشیائے ضروریہ کی قیمتوں کے پچھلے ہفتے کے انڈیکس  میں 15 فیصد اضافہ ہواتھا، اس سے بڑا اضافہ 60 فیصد بجلی کے نرخوں میں ہوا تھا۔

ان کا کہنا تھا کہ پرائس انڈیکس میں  70 فیصد کا اضافہ  ایل پی جی کی قیمت میں تھا،ان دونوں اشیا کی قیمتوں میں ہوشربا اضافے کا شرح سود سے تعلق نہیں۔

ان کا مزید کہنا تھا کہ ان قیمتوں کا اضافہ صرف حکومت کی ناقص پالیسی کی وجہ سے ہوا ہے،حکومت بدستور عوام اورنجی شعبےپراپنی نااہلی کا وزن ڈال رہی ہے۔