تفصیلات کے مطابق انٹرنیشنل کرکٹ کونسل (آئی سی سی) پاکستان میں چیمپئنز ٹرافی کے انعقاد کے لیے پُر اعتماد ہے ۔  آئی سی سی چیمپئنزٹرافی2025 پاکستان کیلئے چیئر مین آئی سی سی  گریگ بار کلے کا کہنا ہے کہ  پاکستان میں چیمپئنز ٹرافی 2025 کے میچ کھیلنے اور پاکستان کا سفر کرنے میں دیگر ٹیموں کو کوئی پریشانی نہیں ہوگی۔ 

انہوں نے کہا کہ لمبے عرصے بعد پاکستان میں آئی سی سی کے ایونٹ کا انعقاد خوش آئند ہے  اور ہمیں امید ہے کہ پاکستان  اس ایونٹ کیلئے بہترین انتظامات کرے گا ، اگر ہم پاکستان کو اہل نہ سمجھتے تو کبھی اس کا انتخاب نہ کرتے۔

آئی سی سی چئیرمین نے کہا کہ سیاسی حالات ہمارے کنٹرول میں نہیں ہیں لیکن کرکٹ حالات کو بہتر بنا سکتے  ہیں ، کرکٹ سے پاک بھارت تعلقات بہتر ہوسکے تو خوشی ہوگی ۔ 

چیئرمین گریگ بارکلے  کا کہنا تھا  کہ بھارت سمیت کسی اور ملک کو پاکستان میں کوئی مسئلہ نہیں ہوگا، مجھے یقین ہے کہ  پاکستان بہترین سیکیورٹی پلان بنائے گا اور ہم وہاں کرکٹ کو آگے لے کر جا سکیں گے۔ 

چیئر مین آئی سی سی  نے پاکستان میں چیمپئنز ٹرافی کے انعقاد کو پاکستان کے لیے سنہری موقع قرار دیا ہے۔

واضح رہے  کہ 2017 میں آئی سی سی چیمپئنز ٹرافی کے دفاعی چیمپئن پاکستان کو 2025 میں اگلے ایڈیشن کا میزبان نامزد کیا گیا ہے ۔

یاد رہے کہ ہندوستان اور سری لنکا کی 1996 ورلڈ کپ کی مشترکہ میزبانی کے بعد سے یہ  کسی ایشیائی ملک میں کرکٹ کا پہلا بڑا ایونٹ ہو گا ۔ 

2009 میں سری لنکا کی ٹیم پر دہشت گردوں کے حملے کے بعد ہوم گراؤنڈ پر بین الاقوامی کرکٹ میچز کا سلسلہ معطل ہو گیا تھا۔

نیوزی لینڈ کا دورہ پاکستان منسوخ

یاد رہے کہ اس سے قبل ستمبر میں  نیوزی لینڈ نے پنڈی کرکٹ اسٹیڈیم میں سیریز کے پہلے ایک روزہ میچ سے چند لمحے قبل ہی سیکیورٹی  وجوہات  کے باعث دورہ منسوخ کرنے کا اعلان کیا تھا۔

نیوزی لینڈ کرکٹ کے چیف ایگزیکٹو ڈیوڈ وائٹ کا کہنا تھا کہ جو تجاویز ہمیں موصول ہوئیں اس کو مدنظر رکھتے ہوئے اس دورے کو جاری رکھنا ممکن نہیں تھا۔ نیوزی لینڈ کے ساتھ سیریز منسوخ ہونے سے پاکستان کو بڑا دھچکا  پہنچا تھا۔

نیوزی لینڈ کی ٹیم 18سال کے طویل عرصے کے بعد ون ڈے اور ٹی20 سیریز کھیلنے کے لیے پاکستان کے دورے پر آئی تھی جہاں دورے کے دوران کیویز نے تین ون ڈے اور پانچ ٹی20 میچوں کی سیریز کھیلنی تھی۔

برطانیہ کا دورہ پاکستان منسوخ

نیوزی لینڈ کے بعد انگلینڈ نے بھی   دورہ پاکستان سے دستبرداری کا   اعلان کیا تھا ۔ انگلینڈ کی ٹیم کو دو ٹی20 میچوں کی سیریز کے لیے رواں ماہ  میں پاکستان کا دورہ کرنا تھا۔

انگلش کرکٹ بورڈ کی جانب سے جاری بیان میں کہا گیا کہ رواں سال کے اوائل میں ہم نے اکتوبر میں ورلڈ کپ کی تیاریوں کے سلسلے میں پاکستان میں دو ٹی20 میچ کھیلنے پر آمادگی ظاہر کی تھی اور اس کے ساتھ ساتھ خواتین ٹیم کے مختصر ٹور کی بھی منظوری دی تھی ۔

 گزشتہ چند سالوں میں پاکستان نے  ویسٹ انڈیز، سری لنکا، بنگلہ دیش، زمبابوے، جنوبی افریقہ اور ایک ورلڈ الیون دو طرفہ سیریز کھیلی ہیں  ۔ پی ایس ایل میں متعدد غیر ملکی کھلاڑی بھی پاکستان میں فرنچائزز کے لیے کھیل چکے ہیں۔