بالی ووڈ اداکارہ کنگنارناوت کے خلاف وارنٹ گرفتاری جاری

تفصیلات کے مطابق نامور اداکارہ کنگنا رناوت  بڑی مشکل میں پھنس گئیں ہیں کیونکہ آج ممبئی کی عدالت میں شاعر اور نغمہ نگار جاوید اختر کی  جانب سے دائر  کردہ  ہرجانے سے متعلق درخواست پر سماعت ہوئی ہے جس میں کنگنا رناوت کے پیش نہ ہونے پر عدالت نے اداکارہ کے قابل ضمانت وارنٹ گرفتاری جاری کرتے ہوئے انہیں 22 مارچ کو ایک بار پھر طلب کرلیا ہے۔ عدالت نے گزشتہ ماہ فروری میں کنگنا کو یکم مارچ کو پیش ہونے کا حکم دیا تھا۔

یاد رہے کہ شاعر و نغمہ نگار جاوید اختر نے اداکارہ کنگنا رناوت کے خلاف ہرجانے کا مقدمہ دائر کیا تھا جس میں کہا گیا تھا کہ کنگنا نے ایک ٹی وی انٹرویو کے دوران ان پر بے بنیاد اور توہین آمیز تبصرے کیے تھے۔

شاعر جاوید اختر کی جانب سے درج کی جانے والی شکایت میں کہا گیا ہے کہ کنگنا رناوت نے سشانت سنگھ کی موت کے بعد ان کا نام بالی ووڈ میں ایک ڈرگزگروپ میں گھسیٹا ہے لہذا اداکارہ کنگنا رناوت کی جانب سے لگائے گئےالزامات کی وجہ سے ان کی دل آزاری ہوئی ہے۔