سعودی عرب کا مزید 7 ملکوں سے پروازیں معطل کرنے کا اعلان

سعودی وزارت داخلہ کے مطابق جمہوریہ مالاوی، زامبیا، مڈغاسکر، انگولا، جمہوریہ سیشیلز، موریشس اور کومو روس سے پروازیں معطل کردی گئی ہیں۔

وزارت داخلہ کا کہنا ہے کہ ان ملکوں سے سعودی عرب آنے والوں کو تیسرے ملک میں 14روزہ قرنطینہ کرنا ہوگا، پابندی سعودی شہریوں سمیت غیر ملکیوں پر بھی نافذ ہوگی۔

خیال رہے کہ سعودی عرب وزارت داخلہ نے جنوبی افریقا سمیت 7 ممالک کے لیے پروازیں پہلے ہی معطل کی ہوئی ہیں اُن میں نمیبیا، موزمبیق، زمبابوے اور دیگر افریقی ملک شامل ہیں۔

ادھر مالدیپ نے جنوبی افریقہ، بوٹسوانا، زمبابوے، موزمبیق، نمیبیا، لیسوتھو اور ایسواتینی کے مسافروں پر پابندی لگا دی اور گزشتہ 2 دنوں میں ان 7 افریقی ملکوں سے آنے والوں کو 14 دن قرنطینہ میں رہنا ہو گا۔

اسرائیل نے بھی آج شام سے تمام غیر ملکیوں کے لیے اپنی سرحدیں بند کرنے کا اعلان کیا ہے۔

آسٹریلیا میں اومی کرون قسم کے کیسز رپورٹ ہوئے ہیں، آسٹریلین طبی حکام کے مطابق جنوبی افریقہ سے سڈنی آنے والے 2 مسافروں میں وائرس کی تصدیق ہوئی ہے۔