حکومت عام آدمی کوزیادہ سےزیادہ ریلیف فراہم کرنےکیلئےتمام ممکنہ اقدامات کررہی ہے:وزیراعظم

تفصیلات کے مطابق احساس راشن پروگرام سے متعلق اجلاس کی صدارت کرتے ہوئےوزیراعظم عمران خان نے کہا کہ مہنگائی کی وجہ سے غریب ترین لوگوں کو اشیاء ضروریہ پر سبسڈی دے رہے ہیں ، زیادہ سے زیادہ غریب گھرانوں کو فائدہ پہنچانے کے لیے رجسٹریشن کے عمل کو تیز کیا جائے۔

وزیر اعظم نے متعلقہ حکام کو کریانہ سٹورز کے اندراج کا عمل تیز کرنے کی ہدایت کی تاکہ اس پروگرام کے تحت زیادہ سے زیادہ غریب گھرانے مستفید ہوں۔ انہوں نے کریانہ سٹورز اور ممکنہ طور پر فائدہ اٹھانے والوں کی آگاہی کیلئے ضلعی حکومت کے حکام کو بھی پروگرام میں شامل کرنے کی ہدایت کی۔

وزیر اعظم کو بتایا گیا کہ پروگرام کے تحت 50 ہزار روپے سے کم آمدن والے 2کروڑ گھرانوں کو آٹے، گھی اور دالوں کی قیمتوں پر ایک ہزار روپے ماہانہ اعانت فراہم کی جائے گی۔

انہیں بتایا گیا کہ رواں ماہ کی 15 تاریخ کو ملک بھر میں اس پروگرام کا آغاز کیا جائے گا۔ پروگرام کے تحت کریانہ سٹورز کا اندراج جاری ہے اور اب تک پندرہ ہزار سے زائد سٹورز کا اندراج کیا جا چکا ہے۔

اجلاس میں وزیراعظم کی معاون خصوصی برائے تخفیف غربت سینیٹر ڈاکٹر ثانیہ نشتر، مشیر خزانہ شوکت فیاض ترین، وزیر اعلیٰ گلگت بلتستان خالد خورشید، وزیراعظم کے معاون خصوصی برائے سیاسی امور ڈاکٹر شہباز گل سمیت متعلقہ سینئر افسران نے شرکت کی جبکہ وزیراعلیٰ پنجاب سردار عثمان بزدار، وزیراعلیٰ خیبر پختونخوا محمود خان، وزیراعظم آزاد کشمیر سردار عبدالقیوم خان نیازی نے ویڈیو لنک کے ذریعے اجلاس میں شرکت کی۔