پرائس انڈیکس میں کمی آئی جو خوش آئند ہے، فواد چوہدری

وفاقی وزیر اطلاعات فواد چوہدری نے میڈیا سے گفتگو کرتے ہوئے کہا کہ  اتحادیوں کیساتھ بات چیت اچھی رہے، پنجاب کا نیا لوکل گورنمنٹ ایکٹ کچھ دنوں میں منظور ہو جائے گا، الیکشن کمیشن درست سمت میں آگے بڑھ رہا ہے، الیکشن کمیشن نے ای وی ایم کے استعمال پر تکنیکی کمیٹیاں تشکیل دی ہیں، حکومت الیکشن کمیشن کو ہر قسم کی معاونت فراہم کرے گی، ای وی ایم سے الیکشن کا عمل سستا ہو جائے گا۔

 فواد چودھری کا کہنا ہے کہ  پنجاب کے تمام لوگوں کو صحت کارڈ کی سہولت دی جائے گی، ترقی یافتہ ممالک میں بھی ایسی سہولتیں نہیں ہوتیں۔ سندھ حکومت کا کردار عوام دشمن ہے، سندھ حکومت سپؤلر کا کردار ادا کر رہی ہے، سندھ حکومت بھی صحت کارڈ کے پروگرام میں شامل ہو،  پہلی دفعہ ایسا پروگرام ہو گا جس سے وزیروں کو فائدہ نہیں ہو گا تو شاید اس لیے سندھ حکومت پریشان ہے۔

وفاقی وزیر اطلاعات کا کہنا تھا کہ  مہنگائی کی صورتحال پر غور کیا گیا، پرائس انڈیکس میں کمی آئی جو خوش آئند ہے، عالمی مہنگائی کے اثرات کم کرنے کی کوشش جاری ہے۔انہوں نے کہا کہ  ن لیگ کے ذیادہ تر لوگوں نے کبھی اخبار بھی پورا نہیں پڑھا،  مہنگائی پر شاہد خاقان کے ورد کی کوئی حیثیت نہیں، ن لیگ کی پالیسیوں کیوجہ سے ہی حالات خراب ہیں، شاہد خاقان نے اپنی وزارت کو 157 ارب کا مقروض کر دیا تھا۔

 فواد چودھری نے مزید کہا کہ  اپوزیشن تھکے ہوئے پہلوانوں کا اجتماع ہے، اپوزیشن کے تحفظات اس لیے دور نہیں ہو رہے کیونکہ وہ تحفظات دور ہی نہیں کرنا چاہتے، اگر ہماری اصلاحات غلط ہیں تو اپنی تجاویز دے دیں، اپوزیشن نہیں چاہتی کہ نظام میں بہتری آئے،  ای وی ایم کے لیے جتنے بھی فنڈز چاہیئں ہونگے حکومت فراہم کرے گی۔