حکومت عوام کے سامنے اعتراف کرے کہ وہ ناکام ہوچکی ہے: شاہد خاقان عباسی

تفصیلات کے مطابق مسلم لیگ ن کے رہنما شاہد خاقان عباسی کا کہنا تھا کہ ملک میں مہنگائی سے بڑی نیشنل سکیورٹی کونسی ہے، دفاع کے اخراجات اور تنخواہوں کے لیے بھی قرضے لینے پڑ  رہے ہیں، یہ کرپشن اور نالائقی کا اہم نمونہ ہے۔

سابق وزیراعظم کا کہنا تھا کہ جہاں لوگ سلیکٹڈ ہوں اور ووٹ چوری کرکے آئے ہوں انہیں عوام کی پروا نہیں ہوتی، جس طرح حکومت چل رہی ہے جلد ملک مہنگائی میں پہلے نمبر پر ہوگا۔

ان کا کہنا تھا کہ پڑوسی ملک کے مقابلے میں پاکستان میں دوگنا زیادہ مہنگائی ہے، دوسو ممالک میں پاکستان مہنگائی میں تیسرے نمبر پر ہے،اس حکومت کے18 ترجمان ہیں، ان کا مقصد صرف جھوٹ بولنا ہے، پاکستان کے مسائل جھوٹ سے حل نہیں ہوں گے۔ 

شاہد خاقان عباسی کا کہنا تھا کہ حالات کو درست کرنےکے لیے فوری شفاف انتخابات کے سوا کوئی راستہ نہیں، حکومت کے اعداد و شمار پر کوئی ادارہ یقین کرنے کو تیار نہیں۔

ان کا مزید کہنا تھا کہ نومبر میں گزشتہ سال کی نسبت مہنگائی میں 11 فیصد سے زائد اضافہ ہوا ہے، غریب کےگھرکے اخراجات میں ایک سال میں 18فیصد اضافہ ہوا۔