بلاول بھٹو زرداری کا سانحہ مری پر جوڈیشل انکوائری کا مطالبہ

قومی اسمبلی میں اظہار خیال کرتے ہوئے بلاول بھٹو زرداری نے کہا کہ ہم مری میں پھنسے لوگوں کی وہ مددنہیں کرسکے جوکرنی چاہیے تھی، جوشخص بھی مشکل میں ہواس کی مدد کرناحکومت کی ذمہ داری ہے۔

چیئرمین پیپلز پارٹی نے کہا کہ جب لاکھوں لوگ مری پہنچےتووزیرصاحب نےویلکم کیاکہ معیشت بہترہوگئی ہے، دوسرےدن اسی وزیرصاحب نےکہاکہ اتنےلوگوں کومری نہیں جاناچاہیےتھا۔

انہوں نے کہا کہ جب بھی کوئی حادثہ ہوتاہے توموجودہ حکومت متاثرہ لوگوں کوموردالزام ٹھہراتےہیں، پورےاپوزیشن کامطالبہ ہےکہ سانحہ مری پرجوڈیشل انکوائری بنایاجائے۔

بلاول بھٹو زرداری نے کہا کہ مری واقعہ کاجوبھی ذمہ دارہےاس کےخلاف سخت کارروائی ہونی چاہیے،نئےپاکستان میں صرف عوام کاخون سستاہواہےباقی ہرچیزمہنگی ہے۔

انہوں نے کہا کہ سانحہ مری کےوقت وزیراعلیٰ پنجاب پی ٹی آئی کی میٹنگ میں مصروف تھے، جب معاملہ مینج ہوگیا تووزیراعلیٰ پنجاب نےمری کافضائی دورہ کیا۔

ان کا کہنا تھا کہ وزیراعظم اور وزیراعلی حقیقی عوام نمائندے ہوتے تو فوری موقع پر پہنچتے، سانحہ مری پر وزراء کی سیاست کو بند ہونا چاہیے۔

اس سے قبل وفاقی وزیر اطلاعات فواد چوہدری نے کہا کہ آج ملک میں سیاحت کا انقلاب برپا ہوچکا ہے۔

قومی اسمبلی میں اسپیکر اسد قیصر کی زیرِ صدارت اجلاس ہوا جس میں فواد چوہدری نے اظہار خیال کرتے ہوئے کہا کہ اپوزیشن لیڈر عدالت سے چھٹی لے کر پارلیمنٹ آئے، خیال تھا شہباز شریف عوامی لیڈر بن کر بات کریں گے۔

ان کا کہنا تھا کہ لیکن انہوں نے سانحہ مری پر بھی شعبدہ بازی کی، لیڈر پیدا ہوتے ہیں جعلی طریقے سے بنائے نہیں جاتے، تیس سال حکومت میں رہ کر بھی لیڈر نہیں بن سکتے، 24 گھنٹے میں ریسکیو کا عمل مکمل کیا گیا۔

انہوں نے کہا کہ آج ملک میں سیاحت کا انقلاب برپا ہوچکا ہے، یہ ہمیں درس دے رہے ہیں، شہباز شریف جب وزیر اعلیٰ تھے روز واقعات ہوتے تھے، ہمارے ایم این ایز، ایم پی ایز عوام کے ساتھ مری میں کھڑے تھے، ماڈل ٹاؤن یا مری تمام ترقی اپنے گھروں کے اردگرد ہوئی۔

فواد چوہدری نے کہا کہ اج لاکھوں لوگ پاکستان میں انٹرنل سیاحت سے مستفید ہو رہے ہیں، سیاحت کو پرانے سیٹ اپ کے ساتھ نہیں چلایا جاسکتا، بدقسمتی سے ہر چیز نئی بنانی پڑ رہی ہے۔

وفاقی وزیر اطلاعات فواد چوہدری کا مزید کہنا تھا کہ پاکستان کو بنیادوں سے اینٹ لگا کر کھڑا کرنا پڑ رہا ہے، عمران خان کی قیادت میں پاکستان بنے گا، ہم ان کے بوئے ہوئے کانٹے صاف کر رہے ہیں، اگلے سات سال میں بھی ان کا رونا دھونا جاری رہے گا۔