ملک کے مختلف حصوں میں شدید دھند 

تفصیلات کے مطابق  سردی اور شدید دھند نے ڈیرے ڈال لیے ،  سردی  اور دھند کے باعث شہریوں کو مشکلات کا سامنا کرنا پڑرہا ہے ۔ صوبائی دارالحکومت لاہور میں  شدید دھند ریکارڈ کی گئی ، شہر میں حد نگاہ کئی مقامات پر 50 سے بھی کم ریکارڈ کی گئی ۔ 

موٹر وے ایم ون پشاور سے برہان تک اور ایم ٹو سالم سے کوٹ مومن اور بھیرہ سے للہ تک بند ہے ۔ موٹرویز ایم 1، ایم 2، ایم 11 متعدد مقامات سے بند کردی گئیں ۔ حد نگاہ کم ہونے سے صبح کے اوقات میں بھی ڈرائیورز فوگ لائٹس استعمال کرنے پر مجبور ہوگئے ۔

ترجمان موٹروے کا کہنا ہے کہ شہری غیر ضروری سفر سے اجتناب کریں۔ دھندکے باعث لاہور ائیرپورٹ پر فلائیٹ آپریشن بھی ٓمعطل کردیا گیا۔  

سندھ بھر کی مختلف قومی شاہراہوں پر دھند کے باعث حد نگاہ کم  ہے ، این فائیو قومی شاہرہ  پر ، ھالا ، سعید آباد ، سکرنڈ ،مورو ، خیرپور ، سکھر ، اور گھوٹکی ، میں   دھند کے باعث حد نگاہ کم ہو گئی  جبکہ انڈس ہائی وے پر پٹارو، سہون تا لاڑکانہ کے مختلف مقامات پر دھند کے باعث حد نگاہ انتہائی کم ہے ۔

محکمہ موسمیات کے مطابق بارش کے بعد سردی کی لہر میں اضافہ ہوا ہے اور فی الحال بارش کا کوئی امکان نہیں ہے ، دھند کا سلسلہ رواں پورا ہفتہ جاری رہے گا۔

محکمہ موسمیات کا کہنا ہے کہ اسلام آباد ،صوبہ پنجاب بیشتر اضلاع میں موسم خشک اور سرد رہے گا ، پنجاب کے میدانی علاقوں میں شدیددھند چھائے رہنے کی توقع ہے۔  صوبہ کے پی کے بیشتر اضلاع میں موسم سرد رہے گا،  مردان، نوشہرہ، صوابی اور چارسدہ میں رات اور صبح کے اوقات میں دھند چھائے رہنے کی توقع ہے۔ 

 محکمہ موسمیات  کے مطابق صوبہ سندھ کے بیشتر اضلاع میں موسم خشک اور سرد رہے گا۔ سکھر، لاڑکانہ ، جیکب آباد، شہید بینظیر آباد ، موہنجو داڑو اورگردونواح میں صبح اور رات کے اوقات میں شدید دھند پڑنے کا امکان ہے جبکہ  صوبہ بلوچستان کے بیشتر اضلاع میں موسم سرد جبکہ شمالی بلوچستان میں شدید سرد رہنے کی توقع ہے ۔  گلگت بلتستان میں  مطلع ابر آلود رہنے کے ساتھ بعض مقامات پر  ہلکی بارش اور برفباری  کا امکان ہے۔