آسٹریلیا نے نوواک جوکووچ کا ویزہ ایک بار پھر منسوخ کردیا 

تفصیلات کے مطابق عالمی نمبر ایک ٹینس اسٹار آسٹریلین اوپن میں شرکت کیلئے آسٹریلیا میں موجود ہیں ، تاہم سربین ٹینس اسٹار کا ویزا آسٹریلیا نے ایک بار پھر منسوخ کر دیا ہے ۔ اگر ایسا ہوا تو نواک جوکووچ کو تین سال تک آسٹریلیا میں داخلے پر پابندی کا سامنا کرنا پڑ سکتا ہے۔

یاد رہے کہ گزشتہ ہفتے عالمی نمبر ایک نوواک جوکووچ سال کے پہلے گرینڈ سلم ٹینس ٹورنامنٹ آسٹریلین اوپن میں شرکت کیلئے میلبورن پہنچے تو ائیرپورٹ حکام نے ویکسین سے استثنیٰ اور غلط ویزے کی بنیاد پر داخلے سے روک دیا۔

34سالہ جوکووچ کا کہنا تھا کہ وہ ویکسینیشن کے خلاف ہیں انھیں اس ٹورنامنٹ میں کھیلنے کے لیے طبی طور پر استثنیٰ دیا گیا تھا جس پر بہت سے عام آسٹریلوی مشتعل تھے ۔ لیکن آسٹریلیا لینڈنگ کے بعد انھیں ڈرامائی طور پر ملک میں داخل ہونے سے روک دیا گیا۔

نوواک جوکووچ کا ویزا منسوخ کرکے انہیں سرکاری حراستی ہوٹل میں حراست میں رکھا گیا تھا ، اس اقدام کے خلاف جوکووچ کے وکلا نے عدالت میں اپیل دائر کی تھی۔

بعد ازاں عالمی نمبر ایک سربین ٹینس اسٹار نوواک جوکووچ آسٹریلیا ملک بدری کا کیس جیتے تھے، آسٹریلوی عدالت نے جوکووچ کا ویزا منسوخ کرنے کا فیصلہ کالعدم قرار دیا تھا۔عدالتی فیصلے کے مطابق حکومت ٹینس اسٹار کا ویزا منسوخ کرنے کی درست دلیل دینے میں ناکام رہی۔

 آسٹریلوی عدالت نے حکومت کو ٹینس اسٹار نوواک جوکووچ کو ہرجانہ ادا کرنے کا بھی حکم دیا تھا۔

خیال رہے کہ آسٹریلین اوپن کا آغاز میلبورن میں 17 جنوری سے ہو رہا ہے۔