لاہور  پریس کلب کے باہر  دو موٹر سائیکل سواروں کی فائرنگ ، صحافی حسنین شاہ جاں بحق

تفصیلات کے مطابق  لاہور  پریس کلب کے باہر  دو موٹر سائیکل سواروں کی فائرنگ  سے  صحافی حسنین شاہ  جاں بحق ہو گئے۔

شملہ پہاڑی کے قریب نامعلوم افراد کی فائرنگ سے صحافی حسنین شاہ کے جاں بحق ہونے کے معاملے پر سی سی پی او فیاض احمد دیو  نے نوٹس لے لیا،ایس ایس پی آپریشنز سے رپورٹ طلب کرلی گئی۔

  وزیراعلیٰ پنجاب سردار عثمان بزدار نے لاہور پریس کلب کے باہر نجی ٹی وی کے صحافی کے قتل کے واقعہ کا نوٹس لے لیا،  انسپکٹر جنرل پولیس سے رپورٹ طلب کرلی  اور  قتل میں ملوث ملزمان کی جلد گرفتاری کا حکم بھی دیدیا۔

وزیر اعلی پنجاب عثمان بزدار نے کہا کہ  ملزمان کو قانون کی گرفت میں لا کر مزید کارروائی کی جائے، مقتو ل حسنین شاہ کے لواحقین کو ہرصورت انصاف فراہم کیا جائے۔

وزیر اعلی عثمان بزدار  نے مقتول کے لواحقین سے دلی ہمدردی و اظہار تعزیت کیا اور سوگوار خاندان کو انصاف فراہم کرنے کی یقین دہانی بھی کرائی۔

سی سی پی او لاہور نے صحافی کے قتل پرافسوس کا اظہار کیا اور واقعہ کی شدید مذمت کی ہے، سی سی پی او لاہور کی سینئر پولیس افسران کو جائے وقوعہ پر پہنچنے کی ہدایت کردی۔سی سی پی او کا کہنا ہے کہ  ملزموں کی گرفتاری کے لئے تمام وسائل بروئے کار لائے جائیں۔

ترجمان آپریشنز ونگ کا کہنا ہے کہ  ایس ایس پی آپریشنز مستنصر فیروزپریس کلب پہنچ گئے۔مستنصر فیروز نے جائے وقوعہ کا معائنہ کیا۔  پولیس، فرانزک ٹیمیں بھی شواہد اکٹھے کرنے میں مصروف ہیں۔ڈی آئی جی آپریشنز نے پریس کلب سے نکلنے والے راستوں پرسخت چیکنگ کا حکم دیدیا۔