کراچی کنگز نے لاہور قلندرز کا ریکارڈ توڑ دیا 

پی ایس ایل 7 میں کراچی کنگز نے  لاہور قلندرز کا بھی ریکارڈ توڑ ڈالا ۔ اس سے قبل  لاہور قلندرز پی ایس ایل کے ایک  سیزن میں مسلسل چھ میچز ہاری تھی ۔

 سال  2018 میں لاہور قلندرز مسلسل چھ میچز میں ناکام ہوا تھا، کراچی کنگز نے ساتویں ایڈیشن میں مسلسل سات ناکامیوں کے ساتھ لیگ کا نیا ریکارڈ بنالیا ۔ 

گزشتہ روز اسلام آباد اور کراچی کنگز کے  سنسنی خیز مقابلے میں عماد وسیم اور قاسم اکرم کی عمدہ بیٹنگ کے باوجود اسلام آباد نے آخری اوور میں کراچی کنگز کو ڈرامائی انداز میں  ایک رن سے نا قابل یقین شکست دے دی ۔ جس کے بعد  بابر اعظم کی قیادت میں کراچی کنگز مایوس کن انداز میں ٹورنامنٹ سے باہر ہوگئی۔

یاد رہے کہ پاکستان سپر لیگ کے اب تک 6 ایڈیشنز کھیلے جا چکے ہیں جن میں دو مرتبہ اسلام آباد یونائیٹڈ جبکہ پشاور زلمی اور کوئٹہ گلیڈی ایٹرز  ایک، ایک بار پی ایس ایل ٹرافی  حاصل کرنے میں کامیاب رہے ہیں ۔

 پی ایس ایل کے سیزن 5 میں کراچی کنگز اور سیزن 6 میں ملتان سلطانز فاتح قرار پائے تھے۔

سیزن 7 کے سنسنی خیز میچز کا آغاز کراچی میں ہوا تھا جبکہ ایونٹ کا  دوسرا مرحلہ لاہور میں جاری ہے ۔ آج دوسرے مرحلے کے 22ویں میچ  میں آج  پشاور زلمی اور کوئٹہ گلیڈی ایٹرز کی ٹیمیں مدمقابل آئیں گی۔

پوائنٹس ٹیبل: 

 پی ایس ایل 7 میں  پوائنٹس ٹیبل کی بات کی جائے تو اب تک  پوائنٹس ٹیبل پر ملتان سلطانز کی ٹیم 12 پوائنٹس کے ساتھ پہلے نمبر پر جبکہ لاہور قلندرز کی ٹیم 10 پوائنٹس کے ساتھ دوسرے نمبر پر ہے ۔ اسلام آباد یونائیٹڈ8 پوائنٹ کے ساتھ تیسرے نمبر پر ہے جبکہ  کوئٹہ گلیڈی ایٹرز اور پشاور زلمی کے 6، 6 پوائنٹس  ہیں ۔ کراچی کنگز ایونٹ سے باہر ہوچکی ہے ۔ 

پی ایس ایل 7  کا فائنل 27  فروری کو لاہور  کے قذافی اسٹیڈیم میں  ہی کھیلا جائے گا۔