بھارت بہت جلد پاکستان کو مفت کورونا ویکسین فراہم کرے گا

بین الاقوامی میڈیا رپورٹ کے مطابق آنے والے چند ہفتوں میں بھارت پاکستان کو کورونا ویکسین کی 14 ملین خوراکیں مفت فراہم کرے گا جبکہ دونوں ممالک کے درمیان باہمی تعاون کا کوئی معاہدہ موجود نہیں۔پاکستان کو ملنے والی کورونا ویکسین کی کھیپ دنیا کے سب سے بڑے ویکسین ساز ادارے سیرم انسٹیٹیوٹ آف انڈیا کا تیار کردہ ہے اور عالمی طور پر کسی بھی ایک ملک کو دی گئی سب سے بڑی تعداد ہو گی۔ اس ویکسین کی دوسری سب سے بڑی کھیپ یعنی ایک کروڑ 36 لاکھ 56 ہزار خوراکیں نائجیریا کو دی جائیں گی۔گاوی کے مطابق ان خوراکوں کی ترسیل فروری سے مئی کے درمیان متوقع ہے۔

گاوی کی جانب سے کوویکس پروگرام کے حوالے سے اس رپورٹ کے لیے جن تفصیلات کا تبادلہ کیا گیا ہے اس کے مطابق پاکستان کو ایسٹرازینیکا کی تیار کردہ ایک کروڑ 46 لاکھ 40 ہزار آکسفورڈ ویکسین کی خوراکیں فراہم کی جائیں گی۔

واضح رہے کہ کوویکس کورونا وائرس ویکسین کی دو ارب خوراکوں کی پوری دنیا کے درمیانے اور کم آمدنی والے ممالک میں منصفانہ اور مساوی طور پر تقسیم یقینی بنانے کے لیے شروع کیا گیا ایک پروگرام ہے جس کی سربراہی گاوی اور عالمی ادارہ صحت سمیت دیگر ادارے کر رہے ہیں۔ جرمنی، ہالینڈ، برطانیہ اور انڈیا سمیت دیگر ممالک کی ادویات ساز کمپنیاں ویکسین تیار کریں گی جو کہ پھر پوری دنیا میں تقسیم کی جائیں گی۔تاہم اس پروگرام کے تحت پاکستان ان 92 کم آمدنی والے ممالک میں شامل ہے جو گاوی کے کوویکس ایڈوانس مارکیٹ کمٹمنٹ کے تحت مدد کا اہل ہے۔