شیخوپورہ میں کورونا کیسز میں تشویش ناک اضافہ

تفصیلات کے مطابق ملک میں جاری کورونا کی تیسری لہر کے آغاز کے ساتھ ہی  وبا کے پھیلاؤ میں اضافہ ہوا ہے اور پنجاب کے کئی شہروں میں کورونا نے خطرے کی گھنٹی بجادی ہے ۔ شیخوپورہ کے ڈسٹرکٹ ہیڈکوارٹر ہسپتال میں  کورونا کے 20مریض داخل ہوئے ہیں اور  تمام کورونا مریضوں کی حالت تشویش ناک بتائی جارہی  ہے ۔ فوکل پرسن کے مطابق  شیخوپورہ میں کورونا کی تیسری لہر میں 100سے زائد مریض داخل ہوئے ہیں ، جبکہ کورونا کے30سے زائد مریض جان کی بازی ہار چکے ہیں۔  فوکل پرسن کاکہنا ہے کہ پانچ سوافراد کو کورونا ویکسین لگائی جاچکی ہے، کورونا ویکسین کی 4سو ڈوز لگانے کا عمل جاری ہے۔

خیال  رہے کہ صوبہ  پنجاب میں کورونا مریضوں کی تعداد ایک لاکھ86ہزار 659ہوگئی  ہے  جبکہ صوبے میں اب تک 5 ہزار769 افراد جان سے ہاتھ دھو بیٹھے ہیں ۔

واضح رہے کہ پاکستان میں کورونا وائرس کی صورتحال بہتر ہونے کے بعد ایک مرتبہ پھر یہ وائرس دوبارہ تیزی سے پھیلنے لگا ہے اور اس کی نئی قسم کے باعث مختلف شہروں میں مختلف پابندیاں عائد کردی گئی ہیں۔   صوبہ پنجاب کے دارالحکومت لاہور سمیت   مختلف شہروں میں شادی کی تقریبات، کھیلوں کی سرگرمیاں اور جلسوں پر دو ہفتے کی پابندی  لگادی گئی ہے۔ لاہور،راولپنڈی،سرگودھا،فیصل آباد،ملتان،گوجرانوالہ اور گجرات میں تمام انڈور،آؤٹ ڈور میرج ہالز،کمیونٹی سنٹرز اور مارکی 15مارچ سے مکمل طور پر بند ہوں گے۔  کاروباری مراکزشام6بجے بند،ہفتہ اور اتوار کام کرنے کی ہرگز اجازت نہیں ہوگی ۔  تمام مزارت،درگاہیں اور سنیما ہالز بھی مکمل طور پر بند ہوں گے، تمام تفریحی مقامات اور پارکس شام 6بجے بند کر دیے جائیں گے۔