مبینہ تشدد سے پاپڑ فروش کی موت، لواحقین نے قبر کشائی کی درخواست دیدی

گوجرانوالہ : پتوکی میں پاپڑ فروش کی تشدد سے موت کی تحقیقات جاری ہیں اور لواحقین نے پوسٹ مارٹم رپورٹ تبدیل کرنے کا الزام عائد کرتے ہوئے  قبرکشائی کیلئے درخواست دے دی ہے۔

جیو نیوز کے مطابق ہیومن رائٹس سیل کی مدد سے مجسٹریٹ کو دی گئی درخواست میں لواحقین کا مؤقف ہے کہ اشرف سلطان کی میت کو غسل دیا گیا تو جسم پر متعدد نشانات تھے، پوسٹ مارٹم رپورٹ میں کہا گیا تشددکے نشانات نہیں ملے، شک ہے پوسٹ مارٹم رپورٹ تبدیل کی گئی۔علاقہ مجسٹریٹ ساجد احمد نےدرخواست پر متعلقہ حکام کو 29مارچ کوطلب کر لیا ہے۔

پاپڑ فروش اشرف سلطان کی باراتیوں کے مبینہ تشدد سے ہلاکت کا واقعہ 21مارچ کی شام پیش آیا تھا،جس کا علم 22مارچ کو ویڈیو سوشل میڈیا پر وائرل ہونے سے ہوا۔اس واقعےکا انتہائی دلخراش پہلو یہ تھا کہ اشرف کی لاش شادی ہال میں سرعام لاوارث پڑی رہی ، جس پر مکھیاں بھنبھناتی رہیں  لیکن بےحس باراتی لاش کے پاس ہی مزے سےکھانا کھاتے رہے۔