دوسرا ون ڈے :   آسٹریلیا کی پاکستان کیخلاف بیٹنگ جاری

تفصیلات کے مطابق  پاکستان اور آسٹریلیا  کے درمیان دوسرا ون ڈے میچ آج قذافی اسٹیڈیم میں کھیلا جارہا ہے ، پاکستان نے ٹاس جیت کر آسٹریلیا کو بیٹنگ کی دعوت دے دی۔

پاکستانی ٹیم میں ایک تبدیلی کی گئی ہے جس میں حسن علی کی جگہ شاہین شاہ آفریدی کو شامل کیا گیا۔

آسٹریلوی کپتان ایرون فنچ کا کہنا تھا کہ  آسٹریلوی ٹیم میں کوئی تبدیلی نہیں کی گئی اور ہم ٹاس جیت جاتے تو باولنگ ہی کرتے ۔

پاکستانی اسکواڈ

پاکستان ٹیم میں فخر زمان ، امام الحق، بابر اعظم ، محمد رضوان ، افتخار احمد ، خوشدل شاہ سمیت سعود شکیل ،شاہین آفریدی ، زاہد محمود ، وسیم جونئیر اور حارث روف بھی ٹیم میں شامل ہیں۔

آسٹریلوی اسکواڈ 

آسٹریلوی ٹیم میں ایرن فنچ، ٹریوس ہیڈ ، میکڈرمٹ ، لیبوشین ، اسٹوائنس، کیمرون گرین ، ایلکس کیری، شان ایبٹ ، نیتھن ایلیس،ایڈم زمپا اور مچل سوئپسن شامل ہیں۔

پاکستان کو آسٹریلیا کے ہاتھوں گزشتہ پانچ ون ڈے میچز میں مسلسل شکست کا سامنا رہا ہے۔ پہلے ون ڈے میں 88 رنز سے فتح کے بعد مہمان ٹیم کو ایک صفر سے برتری حاصل ہے۔

میچ سے ایک روز قبل پاکستان ٹیم نے آرام کیا جبکہ آسٹریلوی کھلاڑیوں نے مختصر دورانیے کی ٹریننگ بھی  کی۔

واضح رہے کہ آسٹریلوی آل رائونڈر مچل مارش انجری کا شکار ہوکر پاکستان کے خلاف وائٹ بال سیریز سے باہر ہوگئے ہیں، وہ گزشتہ روز لاہور سے دبئی روانہ ہوئے۔

یاد رہےکہ پاکستان نے آسٹریلیا کے خلاف گزشتہ16میں سے صرف ایک میچ ہی جیتا ہے جبکہ پندرہ میچز میں آسٹریلیا نے کامیابی حاصل کی۔