وزیر اعلی پنجاب کا انسداد ڈینگی کیلئے موثر مہم چلانے کا اعلان 

تفصیلات کے مطابق وزیر اعلی پنجاب حمزہ شہباز کی زیر صدارت اجلاس ہوا ،  اجلاس میں انسداد ڈینگی سے متعلق اقدامات کا جائزہ لیا گیا ۔

اراکین پنجاب اسمبلی خواجہ سلمان رفیق، خواجہ عمران نذیر،  پرنسپل سیکرٹری وزیراعلی،  سیکرٹری صحت،  ڈاکٹر وسیم اور متعلقہ حکام نے  اجلاس میں شرکت کی ۔ 

اجلاس میں  وزیراعلی حمزہ شہباز نے کہا کہ انسداد ڈینگی  کی متعلقہ ٹیموں کو متحرک کیا جائے ، مہم میں کوئی غفلت برداشت نہیں کی جائے گی ۔ 

انہوں نے کہا کہ  پنجاب میں ڈینگی ٹیسٹ 90 روپے میں ہو گا۔  2011 کی طرح انسداد ڈینگی کمیٹیوں کو فعال کیا جائے، معیاری اسپرے اور ضروری ادویات کا بروقت انتظام کیا جائے۔

حمزہ شہباز  نے کہا کہ مون سون سیزن سے قبل تمام محکموں کو رزلٹ دینا ہو نگے جبکہ سرویلنس کا موثر نظام وضع کیا جائے۔ 

وزیراعلی ٰ پنجاب نے  مزید کہا  کہ انسداد ڈینگی سے متعلق کارکردگی کو روزانہ کی بنیاد پر مانیٹر کیا جائے گا۔

خیال رہے کہ پنجاب میں ڈینگی کے کیسز سامنے آرہے ہیں۔

یاد  رہے کہ پاکستان میں ڈینگی کا پہلا کیس 1994 ء میں کراچی میں سامنے آیا لیکن بڑے پیمانے پر ڈینگی بخار 2010ء اور 2011ء میں نمودار ہوا۔ ایک محدود اندازے کے مطابق 2011ء میں 370 کے قریب  مریض جان سے ہاتھ دھو بیٹھے جبکہ 15ہزار افراد اس سے متاثر ہوئے ۔