ن لیگ عمران خان کے بیانات کو توڑ مروڑ کرفوج کے خلاف استعمال کر رہی ہے:پرویزالہٰی

اپنے ایک بیان چودھری پرویز الٰہی نے کہا کہ آرمی چیف نے دہشت گردی کے خاتمے کے لیے ناقابل فراموش خدمات انجام دیں،عالمی سطح پر ملک و قوم کے وقار کو بلند کرنے کے لیے آرمی چیف کی خدمات قابل تحسین ہیں۔

انہوں نے کہا کہ فوج اور آرمی چیف ایک دوسرے سے الگ نہیں ہوتے،آرمی چیف کو نشانہ بنانے کا مطلب فوج کو نشانہ بنانا ہوتا ہے۔

اسپیکرپنجاب اسمبلی نے کہا کہ فوج،آرمی چیف کے خلاف پروپیگنڈا کرنے والے عناصر ملکی دفاع کو غیر مستحکم کرنا چاہتے ہیں،فوج اور قوم کے درمیان خلیج پیدا کرنا ملک دشمن قوتوں کا ایجنڈا ہے،فوج دشمن قوتوں کو مایوسی ہو گی، فوج موجودہ بحران سے سرخرو ہو کر نکلے گی۔

چودھری پرویز الہیٰ نے کہا کہ آرمی چیف نے بھارتی جارجیت کا ہمیشہ دندان شکن جواب دیا،سفارتی محاذ پر جنرل قمرجاوید باجوہ کی پس پردہ خدمات بہت اہم رہی ہیں،ملک وقوم کی معاشی مشکلات کم کرنے کے لیےآرمی چیف نے ہمیشہ حکومت کا ہاتھ بٹایا، یورپی ملکوں کے تحفظات دور کیے۔

انہوں نے کہا کہ مسلم ملکوں سے تعلقات کی بہتری اور پائیداری کے لیے بھی جنرل قمرجاوید باجوہ کی خدمات کا اعتراف خود مسلم ممالک کرتے رہے ہیں۔

چودھری پرویز الٰہی نے مزید کہا کہ ن لیگ عمران خان کے بیانات کو توڑ مروڑ کرفوج،آرمی چیف کے خلاف استعمال کر رہی ہے،عمران خان کہہ چکےہیں کہ فوج ہی ملک و قوم کے تحفظ اورسالمیت کی واحد ضامن ہے،پاک فوج کے خلاف نوازشریف کے ٹریک ریکارڈسےقوم اورفوج واقف ہے۔