پاکستان میں مقیم چینی شہریوں کی سکیورٹی یقینی بنائی جائے: وزیراعظم

تفصیلات کے مطابق وزیراعظم شہباز شریف کی زیرصدارت چینی شہریوں کی سکیورٹی کے معاملے پر اجلاس ہوا جس میں وزارت داخلہ کے حکام، چیف سیکرٹریز، سکیورٹی اور سی پیک کے حکام شریک ہوئے۔

اجلاس میں وزیراعظم کو سی پیک پر کام کرنیوالے چینی شہریوں کی سکیورٹی سے متعلق بریفنگ دی گئی  ، اس موقع پر وزیراعظم نے پاکستان میں مقیم چینی شہریوں کی سکیورٹی کو یقینی بنانے کی ہدایت  کرتے ہوئے کہا کہ چینی باشندوں کی سیکیورٹی پر کوئی سمجھوتا نہیں ہوگا۔ 

وزیراعظم کا کہنا تھا کہ  ملک میں امن و امن کی صورتحال کو بہتر کرنے کیلئے بھی فوری اقدامات کیے جائیں اور سی پیک کو نقصان پہنچانے کی کوشش کسی طرح بھی قابل قبول نہیں۔

خیال رہے کہ گزشتہ روز وزیر اعظم شہباز شریف سے چین کے وزیر اعظم لی کی چیانگ سے  ٹیلی فون  پر بات ہوئی تھی جس میں  پاک چین تعلقات کے فروغ اور مضبوطی پر تبادلہ خیال کیا گیا ۔