اسلام آباد ہائیکورٹ : حنیف عباسی کو بطور معاون کام کرنے سے روک دیا گیا

تفصیلات کے مطابق اسلام آبادہائی کورٹ میں آج حنیف عباسی کے عہدے سے متعلق شیخ رشید کی درخواست کی سماعت ہوئی ۔ اسلام آباد ہائی کورٹ کے چیف جسٹس اطہر من اللہ نے ریمارکس دئیے کہ امیدہے کہ حنیف عباسی آئندہ سماعت تک عوامی عہدہ استعمال نہیں کریں گے،اس لئے حنیف عباسی کوعوامی عہدہ رکھنےسےروک رہےہیں۔

چیف جسٹس اطہر من اللہ کے ریمارکس پر حنیف عباسی کے وکیل احسن بھون نے استدعا کی کہ معاون خصوصی پبلک آفس نہیں ہے،اس لئے کام سےنہ روکیں۔

چیف جسٹس نے مزید کہا کہ عدالت توقع کرتی ہے کہ حنیف عباسی  اپنا عہدہ استعمال نہیں کریں گے کیوںکہ ایک سزا یافتہ شخص پبلک عہدہ استعمال نہیں کرسکتا۔ اگر بطور معاون وزیراعظم کو کوئی مشورہ دینا ہے تو بغیر نوٹیفیکیشن بھی ایسا کرسکتےہیں۔ 

عدالت نے کیس کی سماعت 27 مئی تک ملتوی کردی۔

خیال رہے کہ سابق وفاقی وزیر شیخ رشید احمد نے حنیف عباسی کو وزیراعظم شہباز شریف کا معاون خصوصی بنانے کے 27 اپریل 2022 کے نوٹیفکیشن کو چیلنج کیا تھا۔