عمران خان نے پوری قوم کو اخلاقی طور پر تباہ و برباد کردیا ہے: وزیر اعظم شہباز شریف

میڈیا سے گفتگو میں شہباز شریف نے کہا کہ عمران نیازی نے اقتدار کے دوران ساری توجہ اپنے مخالفین کو جیلوں میں ڈالنے پر دی۔ 
 
انہوں نے کہا کہ عمران نیازی کے پاس لوگوں کی بہتری کے منصوبوں کے لیے وقت ہی نہیں تھا، سابق وزیراعظم کے پاس ایک لمحہ نہیں تھا کہ وہ قوم کی فلاح و بہبود کی فکر کرتے۔

وزیراعظم نے مزید کہا کہ عمران نیازی کے پاس گالی گلوچ کے علاوہ کوئی اور کام نہیں تھا، انہوں نے پوری قوم کو اخلاقی طور پر تباہ و برباد کردیا ہے۔

اُن کا کہنا تھا کہ پچھلی حکومت کی پتھر دلی کی وجہ سے تین سال ضائع ہو گئے، اس سے زیادہ ظلم اور زیادتی قوم کے ساتھ نہیں ہو سکتی۔

شہباز شریف نے یہ بھی کہا کہ عمران نیازی دن رات نیب کے سر پر سوار رہتا تھا، عمران نیازی اگر ملک میں سول وار کروانا چاہتا ہے تو یہ قوم اسے نہیں چھوڑے گی۔

انہوں نے کہا کہ اسے قوم کبھی معاف نہیں کرے گی، عمران نیازی کا گریبان ہوگا اور قوم کا ہاتھ ہوگا۔

وزیراعظم نے کہا کہ پی کے ایل آئی میں 50 فیصد مستحق مریضوں کا علاج بالکل مفت ہوگا، اس میں ایک دھیلے کی کرپشن نہیں نکالی جاسکی۔

اُن کا کہنا تھا کہ ماضی میں پی کے ایل آئی کو بےپناہ نقصان پہنچایا گیا۔