لانگ مارچ : اسلام آباد جانیوالے والے تمام راستے بند، پنجاب میں رینجرز طلب

ذرائع کا کہنا ہے کہ  پنجاب کے تمام اضلاع کے داخلی اور خارجی راستوں سمیت اسلام آباد جانیوالی ٹرانسپورٹ بند کردی گئی ہے ۔ امن وامان کی صورتحال برقرار رکھنے کیلئے صوبے میں رینجرز کو بھی طلب کرلیا گیا ہے ۔  

پنجاب حکومت نے امن و امان کی موجودہ صورتحال کے پیش نظر صوبے میں دفعہ 144 نافذ کرنے کا فیصلہ کیا ہے ۔

ذرائع محکمہ داخلہ پنجاب نے کہا ہے کہ کوئی بھی فرد لانگ مارچ میں ضلع سے باہر نہیں نکل سکےگا، تمام ٹرانسپورٹر کو آگاہ کر دیا گیا ہے۔

ذرائع کا کہنا ہےکہ پی ٹی آئی کے لانگ مارچ کو روکنے کے لیے  فیض آباد کے علاقے میں کنٹینر پہنچادیے گئے ہیں۔

واضح  رہے کہ پاکستان تحریک انصاف کی جانب سے کل  25 مئی کو اسلام آباد کیلئے لانگ مارچ کا اعلان کیا گیا ہے ، حکومت کی جانب سے لانگ مارچ کو روکنے گزشتہ رات ملک کے مختلف علاقوں میں چھاپے مارے گئے اور سینکڑوں پی ٹی آئی کارکنوں کو گرفتار کیا جا چکا ہے ۔