' اگر حکومت نے کریک ڈاؤن جاری رکھا تو ہر چوراہا سری نگر ہائی وے بنے گا'

پشاور میں پاکستان تحریک کی قیادت کے ہمراہ اہم پریس کانفرنس کرتے ہوئے مخدوم شاہ محمود قریشی نے کہا کہ کل ہم کارکنوں سمیت اسلام آباد پہنچیں گے، ہماری پالیسی پر امن احتجاج ہے، ہم اسلام آباد کو فتح نہیں کرنے جارہے، احتجاج ہمارا آئینی حق ہے، پنجاب کے کارکنوں سے اپیل ہے کہ گرفتاریوں سے بچیں، کارکنان انڈر گراؤنڈ ہوجائیں اور رشتہ داروں کے گھر چلے جائیں۔

شاہ محمود قریشی ںے کہا کہ گزشتہ رات پی ٹی آئی کارکنوں کےگھروں پر چھاپے مارے گئے، پولیس نے خواتین کو ہراساں کیا، ہمارا ایک ہی مطالبہ ہے کہ انتخابات کرائے جائیں۔ پیپلزپارٹی شہباز شریف کو دھمکا رہی ہے کہ ایسا کیا تو ہم لاتعلق ہوجائیں گے، حکومت بوکھلاہٹ کا شکار ہے، حکومت کوئی فیصلہ نہیں کر پارہی، مفتاح اسماعیل ملک سے باہر بیٹھے ہیں۔

انہوں نے مزید کہا کہ کارکنوں کے خلاف چھاپے مار کارروائیوں کی مذمت کرتے ہیں، پنجاب اور سندھ میں پی ٹی آئی کے کارکنوں کے گھروں پر چھاپے مارے جا رہے ہیں، ہمارے خلاف دفعہ 144 اور 16 ایم پی او کے خلاف کارروائیاں ہو رہی ہیں۔ پنجاب کے کارکنوں سے اپیل ہے کہ گرفتاریوں سے بچیں، کارکنان انڈر گراؤنڈ ہوجائیں اور رشتہ داروں کے گھر چلے جائیں۔

اُن کا کہنا تھا کہ پنجاب میں 3سال سات 7 پی ٹی آئی کی حکومت رہی، اس دوران کئی دھرنے اور مظاہرے ہوئے، اگر ہم نے کوئی گرفتاریاں کر رکھی تھیں تو ہمیں کوئی بتادیں۔ پی ٹی آئی کی پالیسی میں کبھی بھی تصادم نہیں، کارکنان کسی بھی صورت مارچ میں پہنچیں، حقیقی آزادی مارچ ہمارا بنیادی، آئینی اور قانونی حق ہے، پرامن احتجاج ہمارا حق ہے، اس حوالے سے کیس بھی زیر سماعت ہے۔

شاہ محمود قریشی نے کہا ہے کہ ہم اسلام آباد فتح کرنے یا جنگ کیلئے نہیں جارہے ہیں، ایک طرف بہت سی سیاسی جماعتیں ہیں تو دوسری طرف پی ٹی آئی ہے، جمہوری طریقہ اپنایا جائے، فیصلہ عوام پر چھوڑدیا جائے ہمیں قبول ہوگا۔

اپنی پریس کانفرنس کے دوران ان کا یہ بھی کہنا تھا کہ منحرف ارکان کو ہم سے کوئی گلہ نہیں تھا، انہیں کچھ اشارے ملے دوسری طرف چلے گئے، ن لیگ اور پیپلز پارٹی ایک دوسرے کے مخالف تھے، اچانک ایک ہوگئے۔ 14 سال بعد چوہدری شجاعت اور ن لیگ آپس میں ایک ہوگئے، یہ ارینجمنٹس نہیں ہے تو کیا ہے۔

سابق وزیر کے مطابق بلاول بھٹو نےمارچ کیا ہماری حکومت نے کہیں کوئی کنٹینر کھڑا نہیں کیا، لیکن گزشتہ رات پولیس نے خواتین کو ہراساں کیا، چادر اور چار دیواری کا تودم پامال کیا گیا، اگر یہ صورت حال رہی تو ہر شہر ہر چوراہا سری نگر ہائی وے بنے گا، کارکن کسی بھی رکاوٹ کے باعث اسلام آباد نہ پہنچ سکے توموجودہ جگہ سری نگرہائی وے بنےگا۔

انہوں نے کہا وکلا، ڈاکٹرز، انجینیرز، ریٹائرڈ آفسران اس مہم میں شامل ہوگئے ہیں، آپ کس کس کو گرفتار کریں گے؟ پنجاب میں یونین کونسل کی سطح پر چھاپے مارے گئے ہیں، ہم اپنی مارچ کو جاری کرے گے اور ان کو ناکامی کا سامنا ہوگا۔