بلوچستان :شیرانی کے جنگلات میں لگی آگ پر قابو پالیا گیا

وزیراعلیٰ بلوچستان عبدالقدوس بزنجو نے کوئٹہ میں میڈیا سے گفتگو میں بتایا کہ اللہ کا شکر ہے کہ مشترکا کاوشوں سے ایک بہت بڑے چیلنج سے نمٹ گئے ہیں، محکمہ جنگلات، پی ڈی ایم اے، پاک افواج، ایف سی، انتظامیہ اور مقامی لوگوں کی محنت قابل تحسین ہے۔

انہوں نے کہا کہ حکومت ایران کے مشکور ہیں جنہوں نےفائر فائٹر طیارہ فراہم کیا۔ آگ سے متاثرہ افراد کی امداد و بحالی کو ہر صورت یقینی بنایا جا ئے گا۔

قبل ازیں بلوچستان کے علاقے شیرانی کے قدیم جنگلات میں آگ بجھانے کیلئے ایرانی فائر فائٹر طیارہ منگل 24 مئی کو بلوچستان پہنچا اور ریسکیو آپریشن کا آغاز کیا۔

تازہ صورت حال سے متعلق کنزرویٹر محکمہ جنگلات امین مینگل کا کہنا تھا کہ ایرانی فائر فائٹر طیارے نے شیرانی کے جنگلات میں آگ بجھانے کیلئے اسپرے شروع کردیا ہے۔

انہوں نے مزید کہا تھا کہ شیرانی کے قدیم جنگلات میں لگی آگ پر بڑی حد تک کنٹرول کرلیا گیا ہے، جنگلات میں فائر لائن مکمل کنٹرول میں ہے۔

ان کا یہ بھی کہنا تھا کہ زرغون غر کے پہاڑوں میں محکمہ جنگلات اور کمیونٹی کے افراد موجود ہیں، جنگلات میں کچھ جگہوں پر پہلے سے لگی آگ کے بعد انگاروں سے دھواں اٹھ رہا ہے۔

امین مینگل نے کہا کہ آگ مکمل ختم ہونے کے بعد جنگلات میں درختوں اور جنگلی حیات کے نقصانات کا تخمینہ لگایا جائے گا، نقصانات کے تخمینہ کے لئے ٹیمیں تشکیل دی جائیں گی۔