بالی ووڈ کے بادشاہ شاہ رخ خان کووڈ 19 سے متاثر

بھارتی میڈیا رپورٹس کے مطابق شاہ رخ خان میں 5 جون کو کووڈ 19 کی تشخیص ہوئی۔

مغربی بنگال کی وزیراعلیٰ ممتا بینرجی نے ایک ٹوئٹ میں کہا کہ ابھی علم ہوا کہ ہمارے برانڈ ایمبیسڈر شاہ رخ خان میں کووڈ کی تصدیق ہوئی ہے، ہم ان کی جلد صحتیابی کے لیے دعاگو ہیں۔

خیال رہے کہ شاہ رخ خان اس وقت 3 فلموں پٹھان، ڈنکی اور جوان کی شوٹنگز میں مصروف ہیں۔

دوسری جانب کترینہ کیف چند روز قبل اس بیماری سے متاثر ہوئی تھیں مگر اس کا انکشاف اب ہوا ہے۔

اداکارہ نے بیماری کی تشخیص کے بعد قرنطینہ بھی مکمل کرلیا ہے۔

کترینہ کیف کو 4 جون کو اپنے شوہر وکی کوشال کے ساتھ یو اے ای میں آئیفا ایوارڈز کی تقریب میں شرکت کرنا تھی مگر وہ بیماری کے باعث وہاں جا نہیں سکیں۔

یہ تو معلوم نہیں کہ دونوں اسٹار کووڈ سے متاثر کیسے ہوئے مگر شاہ رخ خان اور کترینہ کیف نے 25 مئی کو فلمساز کرن جوہر کی 50 ویں سالگرہ کی تقریب میں شرکت کی تھی۔

رپورٹس میں دعویٰ کیا گیا ہے کہ اس تقریب میں شرکت کے باعث متعدد افراد کووڈ سے متاثر ہوئے۔

اس سے قبل 4 جون کو اداکار کارتک آریان نے کووڈ سے متاثر ہونے کی تصدیق کی تھی جبکہ رپورٹس کے مطابق آدتیہ رائے کپور میں بھی اس کی تشخیص ہوئی ہے مگر اداکار نے اس کی تاحال تصدیق نہیں کی۔

دوسری جانب ممبئی میں کووڈ کے کیسز میں اضافے کے بعد حکام کو الرٹ رہنے کی ہدایت کی گئی ہے۔

حکام کی جانب سے فلم اسٹوڈیوز کے لیے بھی ہدایات جاری کی گئی ہیں اور انہیں کسی بھی قسم کی تقریبات کا انعقاد بغیر اجازت کرنے سے روکا گیا ہے۔