عامر لیاقت کے اہلخانہ نے پوسٹ مارٹم کروانے سے انکار کردیا

میڈیا رپورٹس کے مطابق مرحوم ڈاکٹر عامر لیاقت کی بیٹی نے پوسٹ مارٹم سے روک دیا جبکہ عامر لیاقت کی میت چھیپا سرد خانے منتقل کردی گئی ہے۔

بتایا گیا ہے کہ ڈاکٹر عامرلیاقت کا پوسٹ مارٹم کرنےسے ان کی سابقہ بیگم بشریٰ اور بیٹی دعا نےروکا ہے، بیٹےکےیوکے سےواپسی پرپوسٹ پارٹم کروانےیا نہ کروانے کا فیصلہ کیا جائے گا۔

واضح رہے کہ رکن قومی اسمبلی ڈاکٹر عامر لیاقت حسین کراچی میں انتقال کر گئے ہیں، چھیپا ذرائع نے خبر کی تصدیق کرتے ہوئے بتایا ہے کہ عامر لیاقت اپنے گھر میں‌مردہ حالت میں پائے گئے،ان کے ڈرائیور نے ریسکیو عملے کو کال کرکے واقعہ کی اطلاع دی۔

 ڈاکٹر عامرلیاقت حسین 5 جولائی 1971ء میں پیدا ہوئے، انہوں نے پاکستان کے ایک نجی ٹی وی چینل پر مذہبی پروگرام سے اپنے کریئر کا آغاز کیا،سیاسی سطح پر بھی کراچی میں بے حد مقبول رہے اور متحدہ قومی موومنٹ کے ٹکٹ پر رکن اسمبلی منتخب ہوئے۔

ڈاکٹر عامر لیاقت 2002ء سے 2007ء  تک قومی اسمبلی کے ممبر رہے، وہ مشرف دور میں وزیرمملکت بھی رہے، 2018ء میں تحریک انصاف کے ٹکٹ پر رکن قومی اسمبلی منتخب ہوئے۔

عامر لیاقت حسین گزشتہ کچھ عرصے سے نجی زندگی میں شدید مسائل سے دوچار تھے اور ان کی تیسری شادی کا اختتام بھی طلاق پر ہوا تھا، دانیہ شاہ کی جانب سے خلع کی درخواست دائر کرنے کے بعد عامر لیاقت نے ان کی مبینہ آڈیو اور بعد ازاں دانیہ شاہ نے بھی عامر لیاقت کی مبینہ آڈیو اور ویڈیوز لیک کی تھیں اور دونوں نے ایک دوسرے پر سنگین الزامات بھی لگائے تھے۔

بعد ازاں عامر لیاقت نے ہار تسلیم کرتے ہوئے دانیہ شاہ سے معافی مانگتے ہوئے پاکستان چھوڑ جانے کا اعلان کیا تھا، تاہم انہوں نے ملک چھوڑنے کی تاریخ نہیں دی تھی۔